প্ৰথমবাৰলৈ ‘জাতীয় নায়ক’ৰ গলত চেণ্ডেলৰ মালা আঁৰিলে আছুৱে

উচ্চতম ন্যায়ালয়ৰ কাষ চাপি ২০০৫ চনত আই এম ডি টি আইন বাতিল কৰি সদৌ অসম ছাত্ৰ সন্থাৰ পৰা ‘জাতীয় নায়ক’ আখ্যা লাভ কৰিবলৈ সক্ষম হোৱা সৰ্বানন্দ সোণোৱালৰ প্ৰতিকৃতিৰ ডিঙিত আছুৱে প্ৰথমবাৰলৈ আঁৰিলে চেণ্ডেলৰ মালা।

সদৌ অসম ছাত্ৰ সন্থাৰ উদ্যোগত গুৱাহাটী জিলা ছাত্ৰ সন্থাই বুধবাৰে শ্বহীদ ন্যাসৰ সন্মুখত মুখ্য মন্ত্ৰী সৰ্বানন্দ সোণোৱালৰ লগতে প্ৰধান মন্ত্ৰী নৰেন্দ্ৰ মোদী, গৃহ মন্ত্ৰী অমিত শ্বাহৰ প্ৰতিকৃতিত চেণ্ডেলৰ মালা পিন্ধাই পাছত সেই প্ৰতিকৃতিসমূহ দাহ কৰে।

মন কৰিবলগীয়া যে, এসময়ত ‘জাতীয় নায়ক’ উপাধি দিয়া সৰ্বানন্দ সোণোৱালৰ প্ৰতীকত ‘মই জাতীয় খলনায়ক’ বুলি উল্লেখ কৰে আছুৱে।

নাগৰিকত্ব সংশোধনী বিধেয়কৰ বিৰুদ্ধে ৰাজ্যৰ সৰ্বত্ৰে বিভিন্ন দল-সংগঠনে প্ৰতিবাদ সাব্যস্ত কৰি থকাৰ মাজতে এইদৰে প্ৰতিবাদ সাব্যস্ত কৰে সদৌ অসম ছাত্ৰ সন্থাই।

কেন্দ্ৰই অসম চুক্তি উলংঘা কৰা, অবৈধ বাংলাদেশীক ৰক্ষণাৱেক্ষণ দিয়া, সাম্প্ৰদায়িক, অসংবিধানিক আৰু খিলঞ্জীয়াবিৰোধী নাগৰিকত্ব সংশোধনী বিধেয়ক বলপূৰ্বকভাৱে জাপি দিয়া সিদ্ধান্তৰ বিৰোধিতা কৰি আজি এনেধৰণে প্ৰতিবাদ কৰে আছুৱে।

‘প্ৰধান মন্ত্ৰী নৰেন্দ্ৰ মোদী আৰু কেন্দ্ৰীয় গৃহ মন্ত্ৰী অমিত শ্বাহে অসমৰ জনসাধাৰণৰ ওপৰত জাতিধ্বংসী বিলখন জাপি দি যি ষড়যন্ত্ৰ ৰচনা কৰিছে, ইয়াক সদৌ অসম ছাত্ৰ সন্থাই কোনো কাৰণত মানি ল’ব নোখোজো। এই বিলখন আমি কেতিয়াও মানি লোৱা নাছিলো আৰু মানি নলওঁ। সেয়েহে আমি এইধৰণে প্ৰতিবাদ সাব্যস্ত কৰিছো।’ প্ৰতিবাদত অংশগ্ৰহণ কৰি সদৌ অসম ছাত্ৰ সন্থাৰ কেন্দ্ৰীয় কাৰ্য্যনিৰ্বাহক সদস্য সীমান্ত ঠাকুৰীয়াই এইদৰে কয়।

উল্লেখযোগ্য যে, সৰ্বানন্দ সোণোৱালে এসময়ত নিজে অধ্যয়ন কৰা ডিব্ৰুগড় বিশ্ববিদ্যালয়তো তেওঁৰ প্ৰতিকৃতি দাহ কৰে বিশ্ববিদ্যালয়ৰ ছাত্ৰই। লগতে শিৱসাগৰ আছুৱেও সৰ্বানন্দ সোণোৱাল, নৰেন্দ্ৰ মোদী, অমিত শ্বাহ আৰু অগপ সভাপতি অতুল বৰাৰ প্ৰতিকৃতি ফাঁচি কাঠত ওলোমাই প্ৰতিবাদ সাব্যস্ত কৰে।