আজি অসমৰ ভাষা আন্দোলনৰ প্ৰথমগৰাকী শ্বহীদ ৰঞ্জিত বৰপূজাৰীৰ ৬১ সংখ্যক মৃত্যু তিথি, আছুৰ স্মৰণ

আজি অসমৰ ভাষা আন্দোলনৰ প্ৰথমগৰাকী শ্বহীদ ৰঞ্জিত বৰপূজাৰীৰ ৬১ সংখ্যক মৃত্যু তিথি।

আজিৰ মৃত্যু তিথিটোত তেখেতক শ্ৰদ্ধাৰে সোঁৱৰে শিৱসাগৰ ছাত্ৰ সন্থাৰ লগতে ৰঞ্জিত বৰপূজাৰীৰ পৰিয়ালে।

উল্লেখযোগ্য যে ১৯৬০ চনৰ ভাষা আন্দোলনৰ সময়ত ৪ জুলাইৰ দিনা সেই সময়ৰ কামৰূপ জিলাৰ পুলিচ অধীক্ষক পি. বি. পাব্বী ( P. B. Pabbi ) য়ে কটন কলেজৰ হোষ্টেল কেম্পাচৰ ভিতৰতেই নিৰ্বিচাৰ গুলিচালনাৰে ৰঞ্জিত বৰপূজাৰীক হত্যা কৰিছিল।

ভাষা আন্দোলনৰ ভৰপক সময়ৰ এই ঘটনাটোক এটা সম্পূৰ্ণ পৰিকল্পিত ৰাজনৈতিক হত্যাকাণ্ড বুলি সন্দেহ কৰা হৈছিল।

কটন কলেজত পঢ়ি জীৱন গঢ়িবলৈ যোৱা ৰঞ্জিত বৰপূজাৰী নামৰ এই ল’ৰাজন শ্বহীদ হ’ল, কিন্তু ভাষা আন্দোলনৰ এই প্ৰথম শ্বহীদজনৰ প্ৰতি আমাৰ কৰ্ত্তব্য মৃত্যু তিথিটোত শ্বহীদবেদীটোত ধূপ- চাকি জ্বলোৱাতে সীমাবদ্ধ হৈ থাকিল।

যি অলপ সন্মান দিলে কটন কলেজেই দিলে – তেওঁৰ নামত এটা ছাত্ৰাবাস দিলে আৰু হত্যা কৰা স্থানত এটা শ্বহীদবেদী বনালে।

নিজ মাতৃভাষাৰ বাবে প্ৰাণৰ আহুতি দিয়া শ্বহীদ ৰঞ্জিত বৰপূজাৰীৰ বিষয়ে অসমৰ নতুন প্ৰজন্মৰ বেছিভাগেই একো নাজানে।

আনকি শ্বহীদ জনৰ জন্মস্থান শিৱসাগৰতো তেওঁৰ বিষয়ে ভালদৰে জনা মানুহৰ অভাৱ পৰিলক্ষিত হয়।

মৃত্যুৰ ৬১ বছৰৰ পিছত শিৱসাগৰ ছাত্ৰ সন্থাই সিদ্ধান্ত লৈছে এটি আৱক্ষ মূৰ্তি প্ৰতিষ্ঠা কৰাৰ। কেন্দ্ৰীয় শ্বহীদ উদ্যানত এই কথা ঘোষণা কৰিলে ছাত্ৰ সন্থাই।

ইফালে শিৱসাগৰৰ বাসগৃহতো গভীৰ শ্ৰদ্ধাঞ্জলি জ্ঞাপন কৰা হয় শ্বহীদ গৰাকীলৈ। শিৱসাগৰ জিলা সাহিত্য সভাইও পৰিয়ালৰ সহযোগত নিৰ্মাণ কৰিব আন এটা আৱক্ষ মূৰ্তি।