‘ৰাজনৈতিক মেৰুকৰণত স্বচ্ছতা হেৰুৱাইছে ভাৰতে, সংবাদ মাধ্যমৰ স্বাধীনতাত গুৰুত্ব দিয়া উচিত’: নোবেলজয়ী অভিজিৎ বেনাৰ্জী

বিদেশী বিনিয়োগ আকৰ্ষণ কৰাৰ ক্ষেত্ৰত ভাৰতে ‘উল্লেখযোগ্যভাৱে ভাল’ কাম কৰিছে বুলি অভিমত প্ৰকাশ কৰিছে নোবেলজয়ী অৰ্থনীতিবিদ অভিজিৎ বেনাৰ্জীয়ে। অৱশ্যে, আমেৰিকান ডলাৰৰ বিপৰীতে ভাৰতীয় টকাৰ ক্ৰমাগত অৱনমন সম্পৰ্কে তেওঁ চৰকাৰক সতৰ্ক কৰি দিয়ে।

অৰ্থনীতিবিদগৰাকীৰ মতে, দেশৰ ক্ৰমবৰ্ধমান ৰাজনৈতিক মেৰুকৰণৰ বাবে ভাৰতে লাহে লাহে ইয়াৰ প্ৰশাসনিক স্বচ্ছতা হেৰুৱাই পেলাইছে। শনিবাৰে সংবাদ সংস্থা পিটিআইক (PTI) দিয়া এটা সাক্ষাৎকাৰত তেওঁ কয় যে ভাৰত বৰ্তমান এনে এক ৰাজনৈতিক মেৰুকৰণৰ পৰ্যায়ৰ মাজেৰে পাৰ হৈছে, য’ত দীৰ্ঘদিন ধৰি এক সংঘাতময় পৰিৱেশ বিৰাজ কৰিছে।

বেনাৰ্জীয়ে প্ৰশাসনৰ স্বচ্ছতা আৰু সংবাদ মাধ্যমৰ স্বাধীনতাৰ সপক্ষে জোৰাল যুক্তি আগবঢ়াই কয়, “বৰ্তমান সময়ত দেশৰ বাবে আটাইতকৈ গুৰুত্বপূৰ্ণ বিষয়টো হ’ল সংবাদ মাধ্যমৰ স্বাধীনতা আৰু স্বচ্ছতা।” তেওঁ উল্লেখ কৰে যে স্বচ্ছতাৰ অভাৱত দেশৰ বিভিন্ন খণ্ডৰ আৰ্থিক পৰিসংখ্যাসমূহ স্পষ্ট নহ’ব। ইয়াৰ ফলত বিশ্বৰ বৃহৎ বিনিয়োগকাৰীসকলৰ ওচৰত ভাৰতৰ অৰ্থনীতি সদায় এক ‘ৰহস্য’ হৈ ৰৈ যাব।

বিনিয়োগৰ সন্দৰ্ভত অৰ্থনীতিবিদগৰাকীয়ে স্পষ্টভাৱে কয় যে চৰকাৰে কি নীতিৰ ভিত্তিত কাম কৰিছে, সেইটো জানিবলৈ জনসাধাৰণৰ পূৰ্ণ অধিকাৰ আছে। কোনো বিশেষ নিৰ্দিষ্ট বাণিজ্যিক সংস্থাক চৰকাৰে অতিৰিক্ত গুৰুত্ব প্ৰদান কৰিছে নেকি, সেইটোও লোকসকলে জানিব বিচাৰে বুলি তেওঁ মন্তব্য কৰে। তেওঁৰ মতে, যেতিয়ালৈকে চৰকাৰী নীতি আৰু সংবাদ মাধ্যম সম্পূৰ্ণ স্বচ্ছ নহয়, তেতিয়ালৈকে বিশ্ব দৰবাৰত ভাৰতৰ অৰ্থনৈতিক স্থিতি এক ‘অবুজ সাঁথৰ’ হৈয়ে থাকিব।

অৱশ্যে, বিদেশী বিনিয়োগ সংগ্ৰহৰ ক্ষেত্ৰত ভাৰতৰ সাম্প্ৰতিক সফলতাৰ তেওঁ শলাগ লয়। কিন্তু একে সময়তে ডলাৰৰ বিপৰীতে টকাৰ মূল্য হ্ৰাস পোৱা বিষয়টোক তেওঁ চিন্তনীয় বুলি অভিহিত কৰে। শেষত তেওঁ কয় যে দেশৰ অভ্যন্তৰীণ ৰাজনৈতিক মেৰুকৰণে স্বচ্ছতাৰ প্ৰতি থকা দায়বদ্ধতাক শিথিল কৰি তুলিছে, যাৰ ফলত বিশ্বৰ দৃষ্টিত ভাৰত বৰ্তমান এক ৰহস্যময় দেশত পৰিণত হৈছে।