অভিনেত্ৰী মিষ্টি মুখাৰ্জীৰ মৃত্যুৰ পিছতে প্ৰশ্ন উঠিছে Keto ডায়েটকলৈ, কি এই keto ডায়েট?

বলীউড তথা বংগৰ ছবি জগতৰ অভিনেত্ৰী মিষ্টি মুখাৰ্জীৰ অকাল বিয়োগৰ সৈতে এতিয়া জৰিত হৈ পৰিছে এবিধ বিশেষ ডায়েটৰ নাম।

অভিনেত্ৰী মিষ্টি মুখাৰ্জীয়ে মৃত্যুৰ আগলৈকে গ্ৰহণ কৰি আছিল keto ডায়েট।

এই বিশেষ ডায়েটৰ বাবেই অভিনেত্ৰী গৰাকীৰ দুয়োটা কিডনি বিকল হৈ পৰিছিল আৰু তেওঁ মৃত্যুক সাৱটি ল’বলগীয়া হৈছিল বুলি চিকিৎসকে প্ৰকাশ কৰিছে।

কিন্তু কি এই keto ডায়েটিং ? শৰীৰৰ বাবে কেতিয়াবা কিয় মাৰাত্মক হৈ পৰিব পাৰে  keto ডায়েট?

সমগ্ৰ বিশ্বতে এতিয়া জনপ্ৰিয় হৈ পৰা keto ডায়েট হৈছে খাদ্য নিৰ্বাচনৰ এনে এক পদ্ধতি যি ডায়েট কৰিলে অতি কম দিনতে শৰীৰৰ ওজন হ্ৰাস পায়।

এই ডায়েটত ওজন বৃদ্ধি কৰা কাৰ্বহাইড্ৰেটে জাতীয় খাদ্যৰ সলনি উচ্চ প্ৰ’টিন  যুক্ত খাদ্য গ্ৰহণত গুৰুত্ব দিয়া হয়।

কাৰ্বহাইড্ৰেট জাতীয় খাদ্য খোৱা বন্ধ কৰি উচ্চ চৰ্বি আৰু প্ৰ’টিন যুক্ত খাদ্য যেনে তেলাল মাছ, মাংস, কণী, বাটাৰ,উচ্চ চৰ্বিযুক্ত ফল-মূল,ডেইৰীৰ চৰ্বিযুক্ত খাদ্য, তেল থকা ফল যেনে বাদাম আদি খোৱাৰ পৰামৰ্শ দিয়া হয়।

ইয়াৰ বিপৰীতে ভাত,ৰুটি,মিঠা বস্তু আদি কাৰ্বহাইড্ৰেট থকা খাদ্য গ্ৰহণ কৰাটো বন্ধ কৰা হয়।

ইয়াৰ ফলত দেহত কাৰ্বহাইড্ৰেটৰ মাত্ৰা কমি যায় আৰু চৰ্বি তথা প্ৰ’টিনৰ মাত্ৰা বাঢ়ি যায়।

লিভাৰত কেটনছ নামৰ এবিধ পদাৰ্থৰ সৃষ্টি হয়  আৰু সেই পদাৰ্থই শক্তিৰ যোগান ধৰিবলৈ আৰম্ভ কৰে।

ওজন কমোৱা, ডায়েবেটিছৰ চিকিৎসাত keto ডায়েট উপকাৰী যদিও দেহত  প্ৰ’টিনৰ মাত্ৰা অত্যধিক বৃদ্ধি পোৱাৰ ফলত কিডনিত ইয়াৰ প্ৰভাৱ পৰে বুলি চিকিৎসক সকলে কৈ আহিছে।

অভিনেত্ৰী মিষ্টিৰ ক্ষেত্ৰতো অত্যধিক প্ৰ’টিনেই কিডনিৰ বাবে কাল হ’ল বুলি চিকিৎসকে মন্তব্য কৰিছে।