দক্ষিণৰ কিংবদন্তি অভিনেতা মোহনলাললৈ চলচ্চিত্ৰ জগতৰ সৰ্বোচ্চ সন্মান দাদাচাহেব ফাল্কে বঁটা

মালয়ালম অভিনেতা মোহনলাল বিশ্বনাথনক ৫৩ সংখ্যক দাদাচাহেব ফাল্কে বঁটাৰে সন্মানিত কৰা হ’ব। শনিবাৰে এই কথা ঘোষণা কৰিছে কেন্দ্ৰীয় তথ্য আৰু সম্প্ৰচাৰ মন্ত্ৰালয়ে।

মোহনলালে চাৰি দশকৰ কেৰিয়াৰত ৪০০ৰো অধিক ছবিত অভিনয় কৰিছে। মালয়ালম ছবি ‘থিৰানোত্তম’ৰ জৰিয়তে তেওঁ চলচ্চিত্ৰ জগতত আত্মপ্ৰকাশ কৰে। দক্ষিণৰ ছবিত মোহনলালৰ অৱদান বেছি। অৱশ্যে তামিল, হিন্দী, তেলেগু আৰু কানাড়া ছবিতো দেখা গৈছে অভিনেতাগৰাকীক।

তথ্য আৰু সম্প্ৰচাৰ মন্ত্ৰালয়ৰ অফিচিয়েল ই-হেণ্ডলে এই খবৰ ঘোষণা কৰি কয় যে, “দাদাচাহেব ফালকে বঁটা বাছনি সমিতিৰ পৰামৰ্শৰ ভিত্তিত ভাৰত চৰকাৰে ঘোষণা কৰি আনন্দিত হৈছে যে মোহনলালক ২০২৩ চনৰ দাদাচাহেব ফালকে বঁটা প্ৰদান কৰা হ’ব।”

ইয়াত লগতে কোৱা হয় যে দক্ষিণৰ অভিনেতা মোহনলালৰ অভিনয় জীৱনে পৰৱৰ্তী প্ৰজন্মক অনুপ্ৰাণিত কৰিছে। ভাৰতীয় চিনেমা জগতলৈ আগবঢ়োৱা উল্লেখযোগ্য অৱদানৰ বাবে এই বিশেষ সন্মানেৰে সন্মানিত কৰা হৈছে কিংবদন্তি অভিনেতা, পৰিচালক আৰু প্ৰযোজকগৰাকীক।

তেওঁৰ অতুলনীয় অভিনয় প্ৰতিভা আৰু নিৰলস সাধনাই ভাৰতীয় চিনেমাৰ ইতিহাসত এক সোণালী আদৰ্শৰ সৃষ্টি কৰিছে। ২৩ ছেপ্টেম্বৰত অনুষ্ঠিত হ’বলগীয়া ৭১ সংখ্যক ৰাষ্ট্ৰীয় চলচ্চিত্ৰ বঁটা প্ৰদান অনুষ্ঠানত ৰাষ্ট্ৰপতিগৰাকীয়ে তাৰকাগৰাকীক এই বঁটা প্ৰদান কৰিব।

ইয়াৰ পূৰ্বে ২০০১ চনত পদ্মশ্ৰী আৰু ২০১৯ চনত পদ্মভূষণেৰে সন্মানিত কৰা হৈছিল মোহনলালক। যোৱা বছৰ চলচ্চিত্ৰ জগতৰ এই সৰ্বোচ্চ সন্মান অভিনেতা মিথুন চক্ৰৱৰ্তীক প্ৰদান কৰা হৈছিল।