নগাঁও এনকাউণ্টাৰ কাণ্ড: ৰাজহুৱা শুনানি গ্ৰহণ কৰিব অসম চৰকাৰৰ অতিৰিক্ত মুখ্য সচিবে

সমগ্ৰ ৰাজ্যজুৰি জোকাৰণি তোলা নগাঁৱৰ বিতৰ্কিত এনকাউণ্টাৰ সন্দৰ্ভত শুনানি গ্ৰহণ কৰিব অসম চৰকাৰৰ অতিৰিক্ত মুখ্য সচিব পৱন কুমাৰ বৰঠাকুৰে।

যোৱা ২২ জানুৱাৰীত নগাঁৱত আৰক্ষী বিভাগৰ এণ্টি নাৰ্কটিক স্কোৱাডৰ দ্বাৰা কৃৰ্তী কমল বৰা নামৰ এজন যুৱক ভুৱা এনকাউণ্টাৰৰ বলি হোৱাৰ পিছতে সমগ্ৰ ৰাজ্যতে তীব্ৰ প্ৰতিক্ৰিয়াৰ সৃষ্টি হৈছিল।

এই কাণ্ডৰ পিছতে নগাঁও আৰক্ষীৰ বিৰুদ্ধে প্ৰতিবাদত নামি পৰিছিল দল সংগঠনৰ লগতে স্থানীয় ৰাইজ। উত্থাপন হৈছে নগাঁৱৰ আৰক্ষী অধীক্ষক আনন্দ মিশ্ৰৰ নিলম্বনৰ দাবী।

আনহাতে ভুক্তভোগী কৃৰ্তী কমল বৰাৰ ন্যায় বিচাৰি অসম চৰকাৰৰ ওচৰতো দাবী জনাই আহিছে দল-সংগঠনৰ লগতে বিৰোধী ৰাজনৈতিক দল সমূহেও।

আজি নগাঁও উপায়ুক্ত কাৰ্যালয়ৰ দ্বাৰা জাৰি কৰা এক জাননী অনুসৰি অসম চৰকাৰৰ অতিৰিক্ত মুখ্য সচিব পৱন কুমাৰ বৰঠাকুৰে অহা ২৮ জানুৱাৰীত এই সন্দৰ্ভত শুনানি গ্ৰহণ কৰিব।

নগাঁৱৰ আৱৰ্ত্ত ভৱনত ২৮ জানুৱাৰীৰ বিয়লি ২ বজাৰ পৰা ৪ বজালৈ গ্ৰহণ কৰিবলগীয়া শুনানিত অংশগ্ৰহণ কৰি উক্ত ঘটনাৰ প্ৰত্যক্ষদৰ্শী সকলক সাক্ষ্য প্ৰদান কৰিবলৈ অনুৰোধ জনোৱা হৈছে।