ৰাজ্যৰ পৰৱৰ্তী মুখ্য সচিব হিচাপে দায়িত্ব ল’ব আলোক কুমাৰে

ৰাজ্যৰ পৰৱৰ্তী মুখ্য সচিব হিচাপে দায়িত্ব গ্ৰহণ কৰিব বৰ্তমানৰ অতিৰিক্ত মুখ্য সচিব আলোক কুমাৰে।

অহা ১ ছেপ্তেম্বৰত তেওঁ ৰাজ্যৰ বৰ্তমানৰ মুখ্য সচিব টি ৱাই দাসৰ পৰা দায়িত্বভাৰ গ্ৰহণ কৰিব।

উল্লেখযোগ্য যে ১৯৮৪ বৰ্ষৰ আই এ এছ বিষয়া আলোক কুমাৰ ২০১৪ চনত দেশৰ শীৰ্ষ দুৰ্নীতি বিৰোধী শাখা চেণ্ট্ৰেল ভিজিলেঞ্চ কমিচন (চি ভি চি)ৰো সচিব আছিল। বৰ্তমান তেওঁ অসমৰ গৃহ আৰু ৰাজনৈতিক বিভাগ, পি ডব্লিউ ডি আৰু বন আৰু পৰিৱেশ বিভাগৰ অতিৰিক্ত মুখ্য সচিবৰ দায়িত্বত আছে।

আনহাতে ১৯৮২ বৰ্ষৰ আই এ এছ বিষয়া টি ৱাই দাসে ২০১৮ চনৰ ১ মাৰ্চত অসমৰ মুখ্য সচিবৰ দায়িত্ব গ্ৰহণ কৰিছিল। ইয়াৰ উপৰি দাসে অসম প্ৰশাসনিক ন্যায়াধিকৰণ আৰু অসম ৰাজহ বৰ্ডৰ অধ্যক্ষ হিচাপেও কাৰ্যনিৰ্বাহ কৰিছিল।

আলোক কুমাৰে মুখ্য সচিবৰ দায়িত্ব গ্ৰহণ কৰাৰ পিছত অতিৰিক্ত মুখ্য সচিব কুমাৰ সঞ্জয় কৃষ্ণই গৃহ বিভাগ আৰু আনজন অতিৰিক্ত মুখ্য সচিব ৰাজীব বৰাই বিত্ত বিভাগৰ দায়িত্ব ল’ব।