নতুন বছৰত আদালতত প্ৰথমবাৰ ভৰি থৈয়ে আকস্মিক মৃত্যু বৰ্ষীয়ান অধিবক্তাৰ

নৱবৰ্ষৰ দ্বিতীয় দিনটোত প্ৰথমবাৰলৈ বুলি আদালতৰ পদূলিত ভৰি থৈয়ে ঢলি পৰি বুধবাৰে আকস্মিক মৃত্যু সাবটি লৈছে গোলাঘাটৰ বিশিষ্ট অধিবক্তা ঘনকান্ত বৰুৱাই।

দিনৰ প্ৰায় ১১.৪৫ বজাত গোলাঘাটৰ মুখ্য ন্যায়িক দণ্ডাধীশৰ আদালতৰ সন্মুখতে ঢলি পৰে ৬৮ বছৰীয়া বৰুৱা।

লগে লগে তেওঁক কুশল কোঁৱৰ অসামৰিক চিকিৎসালৈ নিয়া হয় যদিও চিকিৎসকে তেওঁৰ মৃত্যু হোৱা বুলি ঘোষণা কৰে।

তেওঁ উচ্চ ৰক্তচাপত আক্ৰান্ত হোৱা বুলি জানিব পৰা গৈছে।

৪২ বছৰ ধৰি ওকালতিত জড়িত হৈ থকা বৰুৱা গোলাঘাট অধিবক্তা সন্থাৰ সম্পাদক হৈ থকা অৱস্থাতে নিৰ্মাণ আৰম্ভ হৈছিল সন্থাৰ ভৱনটোৰ।

ওকালতি জীৱনৰ প্ৰথমচোৱাত দেৱানী আৰু ফৌজদাৰী উভয় গোচৰৰ কাম কৰা বৰুৱাই পিছলৈ দেৱানী অধিবক্তা হিচাপে সুনাম অর্জন কৰে।

বৰুৱাৰ আকস্মিক বিয়োগত অধিবক্তাসকলৰ লগতে আদালতৰ ন্যায়িক বিষয়া আৰু কৰ্মচাৰীসকলৰ মাজতো শোকৰ ছাঁ পৰে।

তেওঁৰ নশ্বৰ দেহ চিকিৎসালয়ৰ পৰা প্ৰথমে অধিবক্তা সন্থাৰ কাৰ্য্যালয়লৈ অনাৰ পিছত সন্থাৰ সভাপতি মহেন্দ্ৰ নাথ দত্ত, সম্পাদক দুৰ্গা প্ৰসাদ জয়ছোৱাল, জিলা আৰু সত্ৰ ন্যায়াধীশ সত্যজিৎ খাউণ্ড, জিলা আইন সেৱা প্ৰাধিকাৰীৰ সচিব জয়দেৱ কোঁচ, মহকুমা ন্যায়িক দণ্ডাধীশ (সদৰ) বিচিত্ৰা দত্তৰ অন্যান্য ন্যায়িক বিষয়া-কৰ্মচাৰী আৰু সন্থাৰ সদস্যসকলে শেষ শ্ৰদ্ধাঞ্জলি জনায়।

ইয়াৰ পিছত তেওঁৰ নশ্বৰ দেহ আধাৰ সত্ৰৰ বাসগৃহলৈ নি শেষকৃত্য সম্পন্ন কৰা হয়।

তেওঁ আধাৰ সত্ৰ নিবাসী কমিউনিষ্ট নেতা প্ৰয়াত নৰেন বৰুৱাৰ একমাত্ৰ পুত্ৰ আছিল। গোলাঘাট দেৱৰাজ ৰয় মহাবিদ্যালয়ৰ পৰা স্নাতক পাঠ্যক্ৰম সমাপ্ত কৰি গুৱাহাটীৰ জে বি ল কলেজৰ পৰা তেওঁ আইনৰ ডিগ্ৰী লাভ কৰিছিল।

মৃত্যুৰ সময়ত তেওঁ এগৰাকী জ্যেষ্ঠ ভগ্নী, দুগৰাকী ভগ্নীৰ লগতে পত্নী, দুগৰাকী কন্যা আৰু অধিবক্তা পুত্ৰ অনিৰ্বাণ বৰুৱাক ইহ সংসাৰত এৰি থৈ গৈছে।

গোলাঘাটৰ সামাজিক ক্ষেত্ৰখনত পৰিচিত ব্যক্তি বৰুৱাৰ বিয়োগত বিভিন্নজনে শোক প্ৰকাশ কৰিছে।