আমেৰিকা আঁতৰিল! WHOক ৩কোটি ডলাৰৰ সাহায্য দিয়াৰ কথা ঘোষণা চীনৰ

আমেৰিকাৰ ৰাষ্ট্ৰপতি ডোনাল্ড ট্ৰাম্পৰ সৈতে বিশ্ব স্বাস্থ্য সংস্থা (WHO)ৰ বিবাদ চলি থকাৰ সময়তে ৰাষ্ট্ৰপতিগৰাকীয়ে সংস্থাটোক সাহায্য দিয়া বন্ধ কৰাৰ কথা ঘোষণা কৰিছিল। আমেৰিকা আঁতৰি যোৱাৰ পাছতে এইবাৰ WHOক সহায় কৰিবলৈ আগবাঢ়ি আহিছে চীন।

চীনে কৰ’না ভাইৰাছৰ বিশ্বজোৰা সংকটৰ মোকাবিলা কৰিবলৈ বিশ্ব স্বাস্থ্য সংস্থাক ৩কোটি ডলাৰৰ অতিৰিক্ত পুঁজি দান কৰিব। ইয়াৰ পূৰ্বে চীনে সংস্থাটোক ২কোটি ডলাৰ আগবঢ়াইছিল।

চীনৰ বিদেশ মন্ত্ৰ্যালয়ৰ মুখপাত্ৰ গেং শ্বুৱাংগে কয়,’’চীনে বিশ্ব স্বাস্থ্য সংস্থাক ৩কোটি ডলাৰৰ অতিৰিক্ত পুঁজি দান কৰাৰ সিদ্ধান্ত লৈছে। এই ধন পূৰ্বে দিয়া ২ কোটি ডলাৰতকৈ পৃথক হ’ব। ইয়াৰ উদ্দেশ্য হৈছে কৰ’না ভাইৰাছৰ বিৰুদ্ধে বিশ্বজোৰা যুঁজখনত সহায় কৰা তথা বিকাশশীল দেশসমূহৰ স্বাস্থ্য ব্যৱস্থা শক্তিশালী কৰা।‘’

তেওঁ কয় যে চীনৰ এই সাহায্যই ৰাষ্ট্ৰসংঘৰ সংস্থাটোৰ ওপৰত চীন চৰকাৰ তথা ইয়াৰ জনসাধাৰণৰ আস্থাকে সূচায়।

ইয়াৰ পূৰ্বে বিশ্ব স্বাস্থ্য সংস্থা মুৰব্বী টেড্ৰ’ছে কেইজনমান আমেৰিকাৰ সাংসদে দাবী কৰা তেওঁৰ পদত্যাগৰ বিষয়টো এৰাই চলি বুধবাৰে কৈছিল যে তেওঁ আশা কৰে আমেৰিকাই সংস্থাটোক দিয়া সাহায্য বন্ধ কৰাৰ বিষয়টো পুনৰ বিবেচনা কৰিব।

যোৱা সপ্তাহত আমেৰিকাৰ ৰাষ্ট্ৰপতি ডোনাল্ড ট্ৰাম্পে বিশ্ব স্বাস্থ্য সংস্থাক আমেৰিকাৰ ফালৰ পৰা দিবলগীয়া ধনৰ ওপৰত অস্থায়ীভাৱে নিষেধাজ্ঞাৰ কথা ঘোষণা কৰিছিল।

ট্ৰাম্পে বিশ্ব স্বাস্থ্য সংস্থাৰ ওপৰত বিশ্বজোৰা কৰ’না ভাইৰাছ মহামাৰী নিৰ্মূল কৰাৰ ক্ষেত্ৰত সঠিক পদক্ষেপ গ্ৰহণ নকৰাৰ অভিযোগ তুলিছিল।