শিৱসাগৰ সমষ্টিৰ উপ নিৰ্বাচনত বিজেপিৰ মিত্ৰজোঁটৰ অগপৰ প্ৰাৰ্থীক প্ৰাৰ্থিত্ব প্ৰদান কৰাৰ দাবী
সদ্য প্ৰয়াত বিধান সভাৰ প্ৰাক্তন অধ্যক্ষ প্ৰণৱ কুমাৰ গগৈৰ মৃত্যুৰ পিছতেই খালী হোৱা ১০৮ নং শিৱসাগৰ বিধান সমষ্টিৰ উপ নিৰ্বাচনৰ বাবে বিজেপিৰ পৰিৱৰ্তে মিত্ৰ দল অসম গণ পৰিষদৰ প্ৰাৰ্থীক প্ৰাৰ্থিত্ব দিয়াৰ দাবী জনাইছে দলটোৰ শিৱসাগৰ বিধান পৰিষদে।
শুকুৰবাৰে এই সম্পৰ্কত শিৱসাগৰ জিলা অগপৰ মুখ্য কাৰ্যালয়ত এখন কাৰ্যনিৰ্বাহ সভা অনুষ্ঠিত হয়।
আজি এক প্ৰেছ বিবৃতিৰ জৰিয়তে এই কথা জানিবলৈ দিয়ে অগপ শিৱসাগৰ বিধান পৰিষদৰ সভাপতি ঘন গগৈ আৰু সম্পাদক প্ৰবীণ কোঁৱৰ আৰু ৰুবুল বৰাই।
অসম গণ পৰিষদৰ শিৱসাগৰ বিধান পৰিষদ (শিৱসাগৰ সমষ্টি) সভাপতি ঘন গগৈৰ সভাপতিত্বত অনুষ্ঠিত জৰুৰী কাৰ্যনিৰ্বাহক সভাত শিৱসাগৰ বিধান সভা সমষ্টিৰ উপ নিৰ্বাচন সন্দৰ্ভত সকলোৰে সৰ্বসন্মতি মৰ্মে এক প্ৰস্তাৱ গ্ৰহণ কৰা হয়।
প্ৰস্তাৱ মতে যদি শিৱসাগৰ বিধান সভা সমষ্টিত উপ নিৰ্বাচন অনুষ্ঠিত হয় তেন্তে অগপ আৰু বিজেপি মিত্ৰজোঁটৰ প্ৰাৰ্থী হিচাপে আসনখন অগপ দলৰ প্ৰাৰ্থীক প্ৰদান কৰিব লাগিব।
আনহাতে, যদি অগপ দলৰ প্ৰাৰ্থীক মিত্ৰজোঁটৰ প্ৰাৰ্থী হিচাপে প্ৰাৰ্থিত্ব প্ৰদান নকৰে তেন্তে অসম গণ পৰিষদ দলে বন্ধুত্বপূৰ্ণভাৱে নিৰ্বাচন খেলিব বুলিও সভাত অন্য এক প্ৰস্তাৱ গ্ৰহণ কৰা হয়।
সাধাৰণ পৰিষদৰ এই সভাত প্ৰস্তাৱ আগবঢ়াই অগপৰ কেন্দ্ৰীয় নেতা দিগন্ত কোঁৱৰে আৰু সমৰ্থন কৰে প্ৰবীণ কোঁৱৰে।
সভাৰ অন্তত সৰ্বসন্মতিমৰ্মে গ্ৰহণ কৰা প্ৰস্তাৱটো দলৰ কেন্দ্ৰীয় সমিতিলৈ প্ৰেৰণ কৰা হয়।
কাৰ্যনিৰ্বাহ সভাত অসম গণ পৰিষদৰ শিৱসাগৰ বিধান পৰিষদৰ বিষয়ববীয়া প্ৰভাত ফুকন, বীৰেন গগৈ, যোগেন মিলি, যুৱ পৰিষদৰ কেন্দ্ৰীয় সদস্য পৰাগ বুঢ়াগোহাঁইকে ধৰি বহু সদস্য উপস্থিত থাকে।