আগন্তুক বিধানসভা নিৰ্বাচনৰ প্ৰাকক্ষণত ৰাজ্যৰ মহিলাৰ অধিকাৰ আৰু সুৰক্ষা সুনিশ্চিত কৰিবলৈ ৰাজনৈতিক দলসমূহৰ প্ৰতি নাৰীবাদী ইস্তাহাৰ গোটৰ আহ্বান

আন্তৰ্জাতিক নাৰী দিৱসৰ সৈতে সংগতি ৰাখি অসম নাৰীবাদী ইস্তাহাৰ গোট নামৰ এটি সংগঠনে অসমৰ ২০২৬ চনৰ বিধানসভা নিৰ্বাচনক লক্ষ্য কৰি এক বিশেষ ইস্তাহাৰ প্ৰকাশ কৰিছে। ৰাজ্যখনৰ সকলো ৰাজনৈতিক দল আৰু প্ৰাৰ্থীক উদ্দেশ্যি এই সংগঠনটোৱে জনাইছে যে নিৰ্বাচনী ইস্তাহাৰত মহিলাৰ অধিকাৰ, লিংগ সমতা আৰু সৰ্বাংগীন বিকাশৰ বিষয়বোৰক সৰ্বাধিক গুৰুত্ব প্ৰদান কৰিব লাগে। এই মেনীফেষ্টোখন প্ৰস্তুত কৰা হৈছে ৰাজ্যৰ কৃষক, ব্যৱসায়ী, চাহ বাগিচাৰ শ্ৰমিক, বিভিন্ন গোটৰ মহিলা আৰু সমাজৰ প্ৰান্তীয় পৰ্যায়ৰ লোকৰ সৈতে আলোচনা কৰি।

অসমত প্ৰায় ১.৮ কোটি মহিলা আছে যি ৰাজ্যখনৰ নিৰ্ণায়ক শক্তি। নতুন চৰকাৰ গঠনৰ প্ৰাকক্ষণত মহিলাৰ মৰ্যাদা আৰু নেতৃত্বক ৰাজনীতিৰ কেন্দ্ৰবিন্দু কৰিবলৈ সংগঠনটোৱে দাবী জনাইছে। চৰকাৰী বিভিন্ন আঁচনি থকাৰ পিছতো বহু ক্ষেত্ৰত মহিলাসকলে আজিও বৈষম্যৰ বলি হৈ আহিছে। বিশেষকৈ চাহ বাগিচা, চৰ অঞ্চল, দিব্যাংগ মহিলা আৰু বিভিন্ন লিংগ পৰিচয়ৰ লোকসকলৰ সমস্যাসমূহ এতিয়াও গুৰুতৰ হৈয়ে আছে।

নিৰাপত্তা আৰু ন্যায়ৰ ক্ষেত্ৰত এই মেনীফেষ্টোত গুৰুত্ব আৰোপ কৰা হৈছে। মহিলাৰ বিৰুদ্ধে ঘৰৰ ভিতৰত বা বাহিৰত হোৱা হিংসা ৰোধ কৰিবলৈ বৰ্তমানৰ আইনসমূহৰ কঠোৰ প্ৰয়োগ, ভুক্তভোগীৰ বাবে সহায়কাৰী ব্যৱস্থা আৰু সুৰক্ষিত ৰাজহুৱা পৰিৱেশ গঢ়ি তোলাৰ বাবে আহ্বান জনোৱা হৈছে। একেদৰে, জলবায়ু পৰিৱৰ্তনৰ ফলত হোৱা বানপানী আৰু খহনীয়াই ৰাজ্যৰ মহিলাসকলক সৰ্বাধিক প্ৰভাৱিত কৰিছে। সেয়েহে জলবায়ু বিষয়ক সিদ্ধান্ত গ্ৰহণৰ ক্ষেত্ৰত মহিলাৰ অংশগ্ৰহণ বৃদ্ধি কৰিবলৈ সংগঠনটোৱে দাবী জনাইছে।

শিক্ষা আৰু জীৱিকাৰ দিশটোও মেনীফেষ্টোত প্ৰধান বিষয় হিচাপে স্থান পাইছে। চৰকাৰী বিদ্যালয়ৰ আন্তঃগাঁথনি উন্নত কৰাৰ লগতে মহিলাসকলৰ কৰ্মক্ষেত্ৰত উপযুক্ত মজুৰি, সামাজিক সুৰক্ষা আৰু সন্মানজনক পৰিৱেশ নিশ্চিত কৰিবলৈ আহ্বান জনোৱা হৈছে। বিশেষকৈ আশা কৰ্মী, অংগনৱাড়ী কৰ্মী আৰু চাহ শ্ৰমিকসকলৰ সমস্যাসমূহক প্ৰাধান্য দিবলৈ কোৱা হৈছে। ৰাজনৈতিক দলসমূহে যাতে মহিলাৰ কণ্ঠক গুৰুত্বসহকাৰে লৈ নিৰ্বাচনী প্ৰক্ৰিয়াত তেওঁলোকৰ অংশগ্ৰহণ বৃদ্ধি কৰে, তাৰ বাবেও সংগঠনটোৱে সজোৰে দাবী জনাইছে।

অসমৰ এক সুষম আৰু সৰ্বাংগীন উন্নয়নৰ বাবে মহিলাৰ অধিকাৰ, নিৰাপত্তা, স্বাস্থ্য আৰু নেতৃত্বৰ দিশসমূহক আওকাণ কৰাৰ কোনো অৱকাশ নাই। এই মেনীফেষ্টোখন হৈছে ৰাজ্যৰ ভৱিষ্যত গঢ়াৰ এক দিহা বা দৰ্শন। এতিয়া ৰাজনৈতিক দলসমূহে এই বিষয়সমূহক নিজৰ ইস্তাহাৰত কিমান গুৰুত্বসহকাৰে লয়, সেয়াই হ’ব লক্ষ্যণীয়।