বিহালীত বিজেপি ত্যাগী জয়ন্ত বৰাক কংগ্ৰেছৰ প্ৰাৰ্থিত্ব; অসম সন্মিলিত মৰ্চায়ো দিব প্ৰাৰ্থী!
উপ নিৰ্বাচনৰ বাবে বিহালী সমষ্টিত কংগ্ৰেছে নিজৰ প্ৰাৰ্থিত্বৰ নাম ঘোষণা কৰিছে। বুধবাৰে নিশা এ আই চি চিয়ে সদ্য বিজেপি ত্যাগী নেতা জয়ন্ত বৰাক বিহালী উপ নিৰ্বাচনত প্ৰাৰ্থী হিচাপে ঘোষণা কৰিছে। স্বাভাৱিকতে ইয়াৰ পিছত অসমত বিৰোধী ঐক্যৰ স্থিতিকলৈ প্ৰশ্নৰ অৱতাৰণা হৈছে।
এ আই চি চিয়ে বিহালীৰ লগতে কৰ্ণাটকৰ দুটা সমষ্টিৰ বাবেও উপ নিৰ্বাচনৰ প্ৰাৰ্থীৰ নাম ঘোষণা কৰিছে।কৰ্ণাটকৰ চান্দুৰ এছ টি সমষ্টিৰ প্ৰাৰ্থী হ’ব ই অন্নপূৰ্ণা। একেদৰে চান্নাপটনা সমষ্টিত চি পি যোগেশ্বৰক প্ৰাৰ্থী হিচাপে মনোনীত কৰা হৈছে।
এ আই চি চিয়ে অসমত বিৰোধী ঐক্য অসম সন্মিলিত মৰ্চাক প্ৰায় অন্ধকাৰত ৰাখি প্ৰাৰ্থীৰ নাম ঘোষণা কৰিছে। অসম প্ৰদেশ কংগ্ৰেছ আৰু অসম সন্মিলিত মৰ্চাৰ মিত্ৰতাত প্ৰশ্নৰ মুখলৈ ঠেলি দি এ আই চি চিয়ে বিহালীৰ কংগ্ৰেছ প্ৰাৰ্থীৰ নাম ঘোষণা কৰিলে।
উল্লেখ্য যে বুধবাৰেই প্ৰদেশ কংগ্ৰেছৰ সভাপতি ভূপেন বৰাই ৰাজ্যৰ বিৰোধী ঐক্যমঞ্চৰ সভাপতি পদৰ পৰা পদত্যাগ কৰিছিল। বৰাই উল্লেখ কৰে যে আশ্বাস দিয়াৰ পাছতো কমিটীৰ পৰামৰ্শ এআইচিচিয়ে গ্ৰহণ কৰা নাই।
ইপিনে, জানিব পৰা মতে সাংসদ গৌৰৱ গগৈয়ে বিচৰা মতেই বিজেপি ত্যাগী নেতা জয়ন্ত বৰাই বিহালীত প্ৰাৰ্থিত্ব লাভ কৰিছে। সমষ্টিটোত জয়ন্ত বৰাক কংগ্ৰেছৰ প্ৰাৰ্থী হিচাপে বিচাৰিছিল সাংসদ গৌৰৱ গগৈয়ে।
আনহাতে, কংগ্ৰেছে প্ৰাৰ্থী ঘোষণা কৰাৰ পিছত অসম সন্মিলিত মৰ্চায়ো বিহালীত জয়ন্ত বৰাৰ বিপক্ষে প্ৰাৰ্থী নিক্ষেপ কৰিব নে নাই তাক লৈ চৰ্চা আৰম্ভ হৈছে।