নতুন কোনো ইঞ্জিনিয়াৰিং প্ৰতিষ্ঠান স্থাপনৰ অনুমতি দিয়া নহয়; খালী পৰি ৰৈছে ৫০ শতাংশ আসন

ইঞ্জিনিয়াৰিং অধ্যয়নৰ ক্ষেত্ৰত লেকাম লগালে অল ইণ্ডিয়া কাউন্সিল ফৰ টেকনিকেল এডুকেশ্যনে(AICTE)।

এতিয়া আৰু নতুনকৈ কোনো ইঞ্জিনিয়াৰিং শিক্ষা প্ৰতিষ্ঠান স্থাপনৰ আবেদন গ্ৰহণ কৰা নহয়।

আগন্তুক ২০২২ চনলৈকে AICTE য়ে এই সন্দৰ্ভত নতুন কোনো আবেদন গ্ৰহণ নকৰে।

২০১৯-২০ শৈক্ষিক বৰ্ষত প্ৰতিখন কলেজৰ কাৰিকৰী বিভাগত আসন খালী হৈ পৰি ৰৈছে। ইয়াৰ বাবেই AICTE য়ে এই সিদ্ধান্ত লোৱা বুলি জানিব পৰা গৈছে।

জানিব পৰা মতে, দেশত আণ্ডাৰ গ্ৰেজুৱেট আৰু ডিপ্লমা মিলি ২৭ লাখ আসন আছে। তদুপৰি, প’ষ্ট গ্ৰেজুৱেট পৰ্যায়ত আছে ১ লাখ ৮০ হাজাৰ আসন।

AICTE য়েৰ নতুন হেণ্ডবুকত বিতংভাৱে আগন্তুক শিক্ষা বৰ্ষৰ বিষয়ে থকা নিৰ্দেশনাত  উক্ত সিদ্ধান্তৰ কথা জনোৱা হৈছে।

আই আই টি হায়দৰাবাদৰ চেয়াৰমেন বিভি আৰ মোহন ৰেড্ডিৰ অধ্যক্ষতাত কউন্সিলৰ সমিতিৰ বৈঠকত দুবছৰৰ পাছত এই সিদ্ধান্ত পুনৰ বিবেচনা কৰাৰ সম্ভাৱনাৰ কথা কোৱা হৈছে।

জানিব পৰা মতে ২০১৫ৰ পৰা ২০১৯বৰ্ষৰ ভিতৰত দেশৰ ৫১৮খন ইঞ্জিনিয়াৰিং কলেজ বন্ধ হৈছে।