এয়াৰ ইণ্ডিয়াৰ বিমানৰ খাদ্যত ওলাল ব্লেড; ভুক্তভোগী সাংবাদিক মেথুৰেছ পলে শ্বেয়াৰ কৰিলে অভিজ্ঞতা

শেহতীয়াকৈ বেংগালুৰুৰ পৰা ছান ফ্ৰান্সিস্কোলৈ যোৱা বিমানৰ ভিতৰত দিয়া খাদ্যত ধাতুৰ ব্লেড পোৱা বুলি দাবী কৰাৰ পাছতে এয়াৰ ইণ্ডিয়াই তদন্ত আৰম্ভ কৰিছে। ৯ জুনত এআই ১৭৫ বিমানত যাত্ৰা কৰাহসাংবাদিক মেথুৰেছ পলে নিজৰ দুখজনক অভিজ্ঞতা ছ’চিয়েল মিডিয়াত শ্বেয়াৰ কৰিছিল।

পলে কয় যে তেওঁ এয়াৰ ইণ্ডিয়াৰ ইন-ফ্লাইট কেটাৰিঙৰ দ্বাৰা পৰিবেশন কৰা ফিগ চাট ডিচত ব্লেডখন পাইছিল। এক্সত পলে এটা পোষ্টত লিখিছে, “মই দুই-তিনি ছেকেণ্ড চোবাই খোৱাৰ পাছত বুজিলোঁ যে ই মোৰ খাদ্যত আছে। মই মুখৰ পৰা উলিয়াই পেলোৱাৰ লগে লগে মই বুজিলোঁ যে বস্তুটো এখন ব্লেড৷”

পলে আৰু কয়, “যিকোনো বিমানত ব্লেড থকাটো বিপদজনক। দ্বিতীয়তে, ই মোৰ জিভাখন কাটিব পাৰিলেহেঁতেন। তৃতীয়তে, যদি কোনো শিশুৱে এই খাদ্য খালেহেতেঁন তেন্তে কি হ’লহেঁতেন।”

লগতে অভিযোগ কৰে যে কিছুদিন পাছত এয়াৰ ইণ্ডিয়াই তেওঁক পত্ৰ লিখিছিল আৰু ক্ষতিপূৰণ হিচাপে তেওঁক “পৃথিৱীৰ যিকোনো ঠাইলৈ বিনামূলীয়া বিজনেছ ক্লাছ ভ্ৰমণ”ৰ প্ৰস্তাৱ দিছিল যদিও তেওঁ নাকচ কৰিছিল। পলে কয় যে, ‘সেয়া উৎকোচ আৰু মই ইয়াক গ্ৰহণ নকৰো’।

টাটা গ্ৰুপৰ মালিকানাধীন এয়াৰ ইণ্ডিয়াই এক বিবৃতিত এই ঘটনা স্বীকাৰ কৰে৷বিমানৰ ভিতৰত ধাৰাবাহিকভাৱে হোৱা সমস্যাৰ বাবে যাত্ৰীসকলৰ পৰা ক্ৰমাৎ সমালোচনাৰ সন্মুখীন হৈছে এয়াৰ ইণ্ডিয়া। অসন্তুষ্ট ফ্লাইয়াৰসকলে ছ’চিয়েল মিডিয়ালৈ গৈ অপৰিষ্কাৰ কেবিন, বিকল মনোৰঞ্জন ব্যৱস্থা, আৰু নিম্নমানৰ খাদ্যৰ অভিযোগ উত্থাপন কৰিছে।

তদুপৰি ব্যৱসায়িক শ্ৰেণীৰ যাত্ৰীসকলে বিশেষকৈ লাভ কৰা সেৱাৰ স্তৰৰ সৈতে মিল নোহোৱা টিকটৰ উচ্চ খৰচ সম্পৰ্কীয় সমস্যাৰ ৰিপৰ্ট দিছে। এয়াৰ ইণ্ডিয়াই ক্ষমা বিচাৰি অভিযোগৰ আভ্যন্তৰীণ তদন্ত কৰাৰ প্ৰতিশ্ৰুতি দিছে।