অখিল গগৈৰ সংবাদ মেল : কেন্দ্ৰই অসমৰ বানপানী সমস্যা ৰাষ্ট্ৰীয় সমস্যা হিচাপে স্বীকৃত নহয় বুলি কোৱাৰ পিছতেই সৰ্বত্ৰ প্ৰতিক্ৰিয়া

কালি সংসদত কেন্দ্ৰীয় জলসম্পদ দপ্তৰৰ ৰাজ্যিক মন্ত্ৰী ৰতন লাল কাটাৰিয়াই অসমৰ বানপানীক ৰাষ্ট্ৰীয় সমস্যা হিচাপে স্বীকৃতি দিয়া নহয় বুলি ঘোষণা কৰাৰ পাছতে আজি অসমৰ সৰ্বত্ৰে প্ৰতিক্ৰিয়াৰ সৃষ্টি হৈছে।

কেন্দ্ৰীয় মন্ত্ৰীগৰাকীৰ মন্তব্যৰ পাছতে কৃষক মুক্তি সংগ্ৰাম সমিতিৰ উপদেষ্টা অখিল গগৈয়ে মঙলবাৰে গুৱাহাটীৰ গান্ধীবস্তিত থকা দলৰ মুখ্য কাৰ্য্যালয়ত এখন সংবাদ মেল সম্বোধন কৰি বিজেপি চৰকাৰক তীব্ৰ সমালোচনা কৰে।

সংবাদ মেল সম্বোধন কৰি অখিল গগৈ প্ৰধান মন্ত্ৰী নৰেন্দ্ৰ মোদীয়ে ডিঙিত অসমৰ গামোচালৈ যোগ অভ্যাস কৰি অসমৰ মানুহক আৱেগিক ব্লেকমেইলিং কৰাৰ বাহিৰে আন একো কৰা নাই বুলি সমালোচনা কৰে।

কৃষক মুক্তি সংগ্ৰাম সমিতিয়ে অতি সোনকালে অসমৰ বান সমস্যাক ৰাষ্ট্ৰীয় সমস্যা হিচাপে ঘোষাণা কৰাৰ দাবীৰে ৩ জুলাইত সমগ্ৰ ৰাজ্যজুৰি প্ৰধানমন্ত্ৰীৰ পুত্তলিকা দাহ কৰাৰ সিদ্ধান্ত গ্ৰহণ কৰে।

আনহাতে, অখিল গগৈয়ে বিজেপিৰ অসম ভিজন ডকুমেণ্টত ব্ৰহ্মপুত্ৰ খনন আৰু এক্সপ্ৰেছ হাইৱেৰ অভিলাসী আঁচনিৰ কথা উল্লেখ কৰি কয় যে কালি সংসদত বিজেপিয়ে ব্ৰহ্মপুত্ৰ খনন অসম্ভৱ বুলি কোৱাৰ লগে লগে বিজেপি দলৰ মিথ্যাচাৰ ৰাইজৰ আগত ওলাই পৰিল। বিজেপি দলৰ এনে স্বজনবিৰোধী ঘোষনাই দলটোক বিশ্বাসঘাটক বুলি পুনৰ বাৰ স্পষ্ট কৰি দিলে বুলি গগৈয়ে সমালোচনা কৰে।

তদুপৰি, ছয় জনগোষ্ঠীৰ জনজাতিকৰণৰ প্ৰসংগ উল্লেখ কৰি কৃষক মুক্তি সংগ্ৰাম সমিতিৰ উপদেষ্টাগৰাকীয়ে বিজেপিয়ে কালি সংসদত প্ৰকাৰন্তে ছয় জাতিৰ জনজাতিকৰণ সম্ভৱ নহয় বুলি ঘোষণা কৰা বুলি কয়।

ইতিমধ্যে মডেলিটি কমিটিৰ অনুমোদন দি থোৱাৰ পাছতো পুনৰ মডেলিটি কমিটি অনুমোদনৰ কথা কোৱাৰ উদ্দেশ্য হ’ল ছয় জনগোষ্ঠীক ঠগা বুলিও অখিল গগৈয়ে মন্তব্য কৰি ছয় জনগোষ্ঠীৰ নেতৃবৃন্দক বিজেপি চৰকাৰৰ বিৰুদ্ধে প্ৰতিবাদ কৰাৰ বাবে আহ্বান জনায়।