আলিগড় মুছলিম বিঃবিদ্যালয়ক বায়ু সেনাই দিয়া যুদ্ধ বিমান ৯.৯৯ কোটি টকাত বিক্ৰীৰ বাবে ওলাল OLXত

ভাৰতীয় বায়ু সেনাই আলিগড় মুছলিম বিশ্ববিদ্যালয়ক উপহাৰৰূপে প্ৰদান কৰা এখন এয়াৰক্ৰাফ্ট OLXৰ যোগেদি ৯.৯৯ কোটি টকাত বিক্ৰীৰ কৰা হ’ব!

যোৱা সোমবাৰে OLXৰ ৱেবচাইটত এইদৰে এয়াৰক্ৰাফ্টৰ ফ’টোসহ এক প’ষ্ট আপলোড হোৱাৰ পিছতে চাঞ্চল্যৰ সৃষ্টি হৈছে সংবাদ মাধ্যমত।

উল্লেখ্য যে ভাৰতীয় বায়ু সেনাই ২০০৯ বৰ্ষত প্ৰসিদ্ধ আলিগড় মুছলিম বিশ্ববিদ্যালয়ক এখন এয়াৰক্ৰাফ্ট উপহাৰৰূপে প্ৰদান কৰিছিল।

ইয়াৰ পিছতে বিশ্ববিদ্যালয়খনৰ কৰ্তৃপক্ষই শিক্ষানুষ্ঠানখনৰ কেম্পাছত এয়াৰক্ৰাফ্টখন এক প্ৰতীকৰূপে প্ৰতিষ্ঠা কৰি ৰাখিছে।

উক্ত এয়াৰক্ৰাফ্টখন যোৱা সোমবাৰে OLXৰ ৱেবচাইটত ৯.৯৯ কোটি টকাত বিক্ৰীৰ বাবে ফ’টোসহ প্ৰকাশ কৰা হৈছিল।

বিষয়টো ৰাজহুৱা হোৱাৰ লগে লগে OLXৰ ৱেবচাইটৰ পৰা এয়াৰক্ৰাফ্টখন বিক্ৰীৰ বাবে দিয়া প’ষ্টটো আঁতৰাই দিয়া হৈছে।

ইয়াৰ পিছতে বিশ্ববিদ্যালয়খনৰ কৰ্তৃপক্ষই এই সম্পৰ্কে প্ৰতিক্ৰিয়া প্ৰকাশ কৰি কয়ে যে, OLXৰ ৱেবচাইটত থকা উক্ত প’ষ্টটো ভুৱা আৰু শিক্ষানুষ্ঠানখন গৰিমাত কালিমা সানিবলৈ এনে কৰা হৈছে।

“OLXৰ ৱেবচাইটত চৌহদত থকা এয়াৰক্ৰাফ্টখন বিক্ৰীৰ বাবে কৰা প’ষ্টটো শুদ্ধ নহয়। বিশ্ববিদ্যালয়ে এইখন বিক্ৰী বা নিলামৰ বাবে কোনো পদক্ষেপ লোৱা নাই। আমি বিষয়টো চালি জাৰি চাইছো। এয়া হৈছে বিশ্ববিদ্যালয়খনৰ গৰিমা লাঘৱ কৰাৰ এক প্ৰচেষ্টা।” বিশ্ববিদ্যালয়খনৰ অধ্যাপক মহঃ ৱাছিম আলিয়ে  এইদৰে কয়।

উল্লেখ্য যে, বিশ্ববিদ্যালয়খনৰ অভিযান্ত্ৰিক শাখাৰ কেম্পাছত বায়ু সেনাৰ এক প্ৰতীকৰূপে ভাৰতীয় বায়ু সেনাৰ উক্ত এয়াৰক্ৰাফ্টখন স্থাপন কৰা হৈছিল।

কোনো দুষ্টচক্ৰই সাম্প্ৰদায়িক বিদ্বেষ বিয়পোৱাৰ উদ্দেশ্যে এই এয়াৰক্ৰাফ্টখন ৯.৯৯ কোটি টকাত বিক্ৰী কৰা হ’ব বুলি OLXৰ ৱেবচাইটত আপলোড কৰা বুলি ধাৰণা কৰা হৈছে।