শিৱসাগৰত আছুৰ বিশাল গণ সত্যাগ্ৰহ; অসমীয়া বিৰোধী বিজেপি চৰকাৰক উচিত শিক্ষা দিয়াৰ হুংকাৰ

১৬ ডিচেম্বৰৰ পৰা সদৌ অসম ছাত্ৰ সন্থাই তিনিদিনীয়া কাৰ্য্যসূচীৰে আহ্বান জনোৱা গণ সত্যাগ্ৰহ কাৰ্য্যসূচীৰ অংশস্বৰূপে আজি শিৱসাগৰতো আছুৰ গণ সত্যাগ্ৰহ কাৰ্য্যসূচী ৰূপায়ন কৰা হয়।

শিৱসাগৰ আঞ্চলিক ছাত্ৰ সন্থাৰ উদ্যোগত চহৰৰ বৰ্ডিং ফিল্ডত গণ সত্যাগ্ৰহৰ বাবে সমবেত হৈ কেইবা শতাধিক জনতাই নাগৰিকত্ব (সংশোধনী) আইন বাতিলৰ দাবীত এক প্ৰতিবাদী সমদল বাহিৰ কৰি শিৱসাগৰৰ পৰিবেশ উত্তাল কৰি তোলে।

প্ৰতিবাদাবী সমদলটোৱে বৰ্ডিং খেলপথাৰৰ পৰা মুক্তিনাথ চাৰিআলি,  দ’লমুখ চাৰিআলি হৈ শিৱসাগৰ জিলা উপায়ুক্তৰ কাৰ্যালয়ৰ সন্মুখত অৱস্থান কৰি ধৰ্ণা কাৰ্যসূচী ৰূপায়ণ কৰে।

আছুৰ এই গণ সত্যাগ্ৰহত ৩০ টা জনগোষ্ঠীয় সংগঠনৰ লগতে কৰ্মচাৰী পৰিষদ, জেষ্ঠ নাগৰিক মঞ্চ, শিক্ষক সমাজ, অ’এনজিচিৰ অৱসৰপ্ৰাপ্ত কৰ্মচাৰী সন্থাৰ লগতে  শিৱসাগৰ সকলো স্তৰৰ ৰাইজে অংশ গ্ৰহণ কৰে।

আছুৰ শিৱসাগৰ জিলা সমিতিৰ সম্পাদক সমীৰণ ফুকনে কয় অসমৰ ৰাইজে ‘কা’ মনা নাই আৰু ভৱিষ্যতেও ‘কা’  নামানে।

‘কা’ৰ বিৰুদ্ধে অসমৰ সৰ্বস্তৰীয় ৰাইজ ওলাই আহিছে। ‘কা’ বিৰুদ্ধে ইতিমধ্যে আইনী যুঁজ চলিছে আৰু ‘কা’ বাতিল নোহোৱালৈকে ৰাজপথৰ সংগ্ৰাম চলি থাকিব। চৰকাৰে অসম আৰু অসমীয়াৰ বিপৰীতে লোৱা সিদ্ধান্তৰ বিৰুদ্ধে অসমৰ ৰাইজ ওলাই আহিছে আৰু আহিব। প্ৰয়োজন হলে দিল্লী, দিছপুৰৰ চৰকাৰ ওফৰাই বিজেপিক উচিত শিক্ষা দিয়া হ’ব বুলিও সমীৰণ ফুকনে কয়।

আনহাতে, শিৱসাগৰ সমূহ সৰ্বধৰ্মীয় ভক্তপ্ৰাণ ৰাইজৰ উদ্যোগত শিৱসাগৰ চহৰৰ মুক্তিনাথ চাৰিআলিস্থিত বৰাট জুৱেলাৰীৰ সন্মুখত নাগৰিকত্ব (সংশোধনী) আইনৰ বিৰুদ্ধে প্ৰতিবাদী কাৰ্যসূচী ৰূপায়ণ কৰা হয়।