‘ব্যক্তিগত খণ্ডৰ সকলো চিকিৎসালয়ক কোভিড ভেকচিন প্ৰদান কেন্দ্ৰৰূপে ব্যৱহাৰ কৰা হ’ব’, কেন্দ্ৰ স্বাস্থ্য মন্ত্ৰণালয়

ব্যক্তিখণ্ডৰ সকলো চিকিৎসালয়কে কোভিড ভেকচিন প্ৰদানৰ কেন্দৰৰূপে ব্যৱহাৰ কৰিবলৈ কেন্দ্ৰই ৰাজ্যসমূহলৈ নিৰ্দেশ প্ৰদান কৰিছে।

মংগলবাৰে কেন্দ্ৰীয় স্বাস্থ্য মন্ত্ৰণালয়ে এক বিবৃতিত কয় যে কোভিড ভেকচিন প্ৰদানৰ দ্বিতীয়টো পৰ্যায়ত ৰাজ্য আৰু কেন্দ্ৰীয় শাসিত অঞ্চলসমূহৰ সকলো ব্যক্তিগত খণ্ডৰ চিকিৎসালয়ক ভেকচিন কেন্দ্ৰৰূপে ব্যৱহাৰ কৰিব লাগিব।

বিবৃতিটোত লগতে কোৱা হৈছে দ্বিতীয় পৰ্যায়ত ৬০ আৰু ৪৫ বছৰৰ উৰ্দ্ধৰ প্ৰতিজন লোককে প্ৰতিষেধক প্ৰদান কৰিবলৈ বিশেষভাৱে গুৰুত্ব প্ৰদান কৰা হৈছে।

ৰাজ্যসমূহৰ সৈতে এক আনুষ্ঠানিক পৰ্যালোচনা বৈঠকত কেন্দ্ৰই পুনৰ কয় যে ভেকচিনৰ কোনো অভাৱ নাই আৰু সেয়েহে ৰাজ্য আৰু কেন্দ্ৰীয় শাসিত অঞ্চলসমূহে কোভিড  টিকাকৰণ কেন্দ্ৰসমূহক পৰ্যাপ্ত পৰিমাণে ভেকচিনৰ আৱণ্টন কৰিব লাগিব। কেন্দ্ৰীয় চৰকাৰৰ লগতো পৰ্যাপ্ত পৰিমাণে ভেকচিন মজুত আছে বুলি বিবৃতিটোত কোৱা হৈছে।

কেন্দ্ৰই ৰাজ্য আৰু কেন্দ্ৰ শাসিত অঞ্চলসমূহৰ সকলো চৰকাৰী আৰু ব্যক্তিগত খণ্ডৰ চিকিৎসালয়লৈ কোবিড ভেকছিনৰ পৰ্যাপ্ত আৱণ্টন নিশ্চিত কৰিছে।

ভাৰত প্ৰধানমন্ত্ৰী জন আৰোগ্য যোজনা (এবি-পিএমজেএৱাই), কেন্দ্ৰীয় চৰকাৰৰ স্বাস্থ্য আঁচনি (চিজিএইচএছ) আৰু ৰাজ্যিক স্বাস্থ্য বীমা আঁচনিৰ অধীনত তালিকাভুক্ত সকলো ব্যক্তিগত চিকিৎসালয়তে ভেকিচন প্ৰদান কৰিবলৈ কোৱা হৈছে।