নেশ্যনেল ডিফেন্স একাডেমিত থকা অসমৰ একমাত্ৰ আসনৰ বাবে নিৰ্বাচিত বোকাখাতৰ অমন বিশাল ঘোষ

ডেৰাডুনত থকা দেশৰ আগশাৰীৰ শিক্ষানুষ্ঠান ইণ্ডিয়ান মিলিটেৰী কলেজৰ পৰা কেন্দ্ৰীয় লোক সেৱা আয়োগৰ দ্বাৰা পৰিচালিত সৰ্বভাৰতীয় বাছনি পৰীক্ষাত উত্তীৰ্ণ হৈ নেশ্যনেল ডিফেন্স একাডেমী (NDA)ত অধ্যয়ন কৰাৰ সুযোগ লাভ কৰিছে বোকাখাতৰ অমন বিশাল ঘোষে ৷

সৰ্ব ভাৰতীয় এই পৰীক্ষাত অমনে অসমৰ বাবে সংৰক্ষিত একমাত্ৰ আসনখন দখল কৰিবলৈও সক্ষম হৈছে ৷

বোকাখাতৰ ডিফলু পথৰ নিবাসী তথা বোকাখাত টাউন মজলীয়া বিদ্যালয়ৰ শিক্ষক সুনীল কুমাৰ ঘোষ আৰু জয়া ঘোষৰ কনিষ্ঠ পুত্ৰ অমন বিশাল ঘোষে এতিয়া ভাৰতবৰ্ষৰ সন্মানজনক শিক্ষা প্ৰতিষ্ঠান নেশ্যনেল ডিফেন্স একাডেমী(NDA)ত  যোগ্যতাৰ ভিত্তিত নামভৰ্তিৰ সুযোগ লাভ কৰিছে।

অমন বিশাল ঘোষে ২০১৬ চনত ইণ্ডিয়ান মিলিটেৰী কলেজত নামভৰ্তি কৰি ২০২১ বৰ্ষত দ্বাদশ শ্ৰেণীৰ চুড়ান্ত পৰীক্ষাত উক্ত কলেজৰ পৰা সুখ্যাতিৰে উত্তীৰ্ণ হৈছিল ৷

অমন বিশালৰ এই সাফল্যত উৎফুল্লিত বোকাখাতবাসী ৷ স্থানীয় বহু দল-সংগঠনৰ লগতে অমনৰ এই সাফল্যত বোকাখাত প্ৰেছ কাবেও শুভেচ্ছা জ্ঞাপন কৰিছে ৷

উল্লেখ্য যে অমন বিশালৰ জ্যেষ্ঠ ভাতৃ আকাশ শ্ৰাৱন ঘোষে ইণ্ডিয়ান মিলিটেৰী কলেজৰ পৰা ২০২০ চনত সুখ্যাতিৰে উৰ্ত্তীণ হৈ ভাৰতীয় সেনা বাহিনীৰ লেফটেনেন্ট হিচাবে যোগদান কৰে ৷