আজি নিশা ২ বাজি ৩০ মিনিটত অম্বুবাচীৰ নিবৃত্তি,অসমৰ দ্বিতীয় শক্তিপীঠ কলিয়াবৰৰ কামাখ্যা দেৱালয়ৰো খোল খাব দুৱাৰ

অসমৰ দ্বিতীয় শক্তিপীঠ কলিয়াবৰৰ শিলঘাট কামাখ্যা দেৱালয়তো প্ৰবৃত্তি অনুসৰি বন্ধ হৈ আছে মন্দিৰৰ মূল দুৱাৰ।
আজি নিশা ২ বাজি ৩০ মিনিটত হ’ব অম্বুবাচীৰ নিবৃত্তি।

অম্বুবাচীৰ নিবৃত্তি অনুসৰি নীলাচলৰ বুকুত থকা কামাখ্যা মন্দিৰৰ লগতে কলিয়াবৰৰ শিলঘাটত থকা দ্বিতীয় শক্তিপীঠ শ্ৰীশ্ৰী কামাখ্যা দেৱালয়ৰো বন্ধ হৈ থকা মন্দিৰৰ মূল দুৱাৰ খোল খাব।

কোভিডসৃষ্ট পৰিৱেশৰ বাবে নীলাচলৰ বুকুত থকা কামাখ্যা মন্দিৰত যোৱা বছৰৰ লগতে এইবৰ্ষতো অনুষ্ঠিত নহ’ল অম্বুবাচী মেলা।

কিন্তু কলিয়াবৰৰ শিলঘাটৰ দ্বিতীয় শক্তিপীঠ কামাখ্যা দেৱালয়ত শাঠৰ এই সময়ছোৱাত মন্দিৰ স্থাপনৰ পৰা আজি পৰ্যন্ত অনুষ্ঠিত হোৱা নাই অম্বুবাচী মেলা। কেৱল পালন কৰা হয় প্ৰবৃত্তি আৰু নিবৃত্তি।

নীলাচলৰ বুকুত থকা কামাখ্যা দেৱালয়লৈ দৈনিক যি দৰে বহু ভক্তৰ সমাগম হয়, তাৰ বিপৰীতে শিলঘাট কামাখ্যা মন্দিৰত ভক্তৰ উপস্থিতি তেনেই সেৰেঙা দেখিবলৈ পোৱা যায়।

হয়তো¸প্ৰচাৰ-প্ৰসাৰ কম হোৱাৰ বাবেই আজিও বহু সংখ্যক লোকে নাজানে শিলঘাটত থকা অসমৰ দ্বিতীয় শক্তিপীঠ কামাখ্যা দেৱালয়ৰ কথা।

উল্লেখ্য যে¸অষ্টম শতিকাতে শালস্তম্ভবংশী ৰজা বনমালীদেৱে শিলঘাটৰ কামকূট(এতিয়াৰ কামাখ্য পাহাৰত) স্থাপন কৰিছিল কামাখ্যা মন্দিৰ।

প্ৰাকৃতিক কাৰনত ধ্বংস হোৱা কামাখ্যা পীঠ পিছত আহোম ৰাজত্ব কালত ১৭৪৫ খ্ৰীষ্টাব্দত ৰজা প্ৰমত্ত সিংহই শিলঘাটতে পুনৰ নিৰ্মাণ কৰায় কামাখ্যা দেৱালয়।

তাৎপৰ্যপূৰ্ণ যে¸অসমৰ দ্বিতীয় শক্তিপীঠ শিলঘাটৰ কামাখ্যাদেৱালয়ৰ প্ৰচাৰ-প্ৰসাৰত যদি গুৰুত্ব দিয়া হয়¸অদূৰভৱিষ্যতে এই মন্দিৰক এক ধৰ্মীয় পৰ্যটনক্ষেত্ৰ হিচাবে গঢ় দিব পৰা যায়।