নিৰ্বাচনী প্ৰচাৰৰ সলনি সমষ্টিবাসীৰ সৈতে প্ৰতিবাদত খোদ দিচপুৰৰ বিজেপি বিধায়ক

লোকসভা নিৰ্বাচনৰ ধামখুমীয়া আৰু অসমত প্ৰধান মন্ত্ৰী নৰেন্দ্ৰ মোদীৰ নিৰ্বাচনী প্ৰচাৰৰ মাজতে সমষ্টিবাসীৰ সৈতে শনিবাৰে প্ৰতিবাদত বহিছে দিচপুৰৰ বিজেপি বিধায়ক অতুল বৰা।

এটা কোম্পানিয়ে “পাহাৰ কাটি” নিৰ্মাণ কৰি থকা সৃষ্টি নগৰ বন্ধ কৰিবলৈ মুখ্য মন্ত্ৰী সৰ্বানন্দ সোণোৱালক “তিনিখনকৈ চিঠি” দিয়াৰ পিছতো কোনো ব্যৱস্থা গ্ৰহণ নকৰাত সমষ্টিৰ অন্তৰ্গত চূণচালিৰ ৰাইজৰ সৈতে প্ৰতিবাদত বহিছে বিধায়কজন।

চূণচালিৰ পাহাৰ এলেকাতে আয়োজিত প্ৰতিবাদী অৱস্থান ধৰ্মঘটটোত বিধায়কজনৰ লগত অঞ্চলটোৰ কেইবাশও লোকে অংশগ্ৰহণ কৰে। বিধায়কজনৰ লগতে চূণশালিবাসীয়েও কেইবাবছৰ ধৰি কোম্পানিটোৰ কাম বন্ধ কৰাৰ দাবী জনাই আহিছে।

“তাৎক্ষণিকভাৱে চূণচালি পাহাৰত সৃষ্টিনগৰ নিৰ্মাণৰ নামত অবৈধ খনন কাৰ্য্য তথা বন ধ্বংসযজ্ঞ বন্ধ কৰিবলৈ দুয়োটা বিভাগকে আহ্বান জনাইছো,” ৰাজ্য চৰকাৰৰ ৰাজহ আৰু বন ও পৰিৱেশ উন্নয়ন বিভাগক বিষয়টো গুৰুত্বসহকাৰে ল’বলৈ আহ্বান বৰাৰ।

বৰাৰ অভিযোগ অনুসৰি যোৱা বছৰৰ শেষৰ ফালে কামৰূপ জিলা প্ৰশাসনে সৃষ্টি নগৰ নিৰ্মাণকাৰী কলকাতাৰ সংস্থা ‘সৃষ্টি নগৰ ইনফ্ৰাস্ত্ৰাকচাৰ ডেভেলপমেন্ট কৰ্পৰে’চন লিমিটেড’ক কাম বন্ধ কৰিবলৈ নিৰ্দেশ দিছিল, কিন্তু কাম এতিয়াও বন্ধ হোৱা নাই।

অঞ্চলটোৰ প্ৰাকৃতিক শোভা ধ্বংস কৰি সৃষ্টি নগৰ পতাৰ পৰিৱৰ্তে শিশু উদ্যান আৰু খোজ কঢ়াৰ স্থানৰূপে গঢ়ি তুলিবলৈ বিধায়কগৰাকীয়ে দাবী জনাইছে।

“বৰ লুইতৰ পাৰত প্ৰাকৃতিক সৌন্দৰ্য্যৰে ভৰি থকা পাহাৰীয়া অঞ্চলটোত সৃষ্টি নগৰৰ সলনি শিশু উদ্যান আৰু গুৱাহাটীৰ জনসাধাৰণৰ বাবে ৱাকিং জ’ন নিৰ্মাণ কৰিব লাগে,” মুখ্য মন্ত্ৰীক আহ্বান বৰাৰ।