বিশ্বনাথত ছাত্ৰ সংগঠনৰ কেইবাজনো সদস্যৰ বিজেপিত যোগদান

কা-বিৰোধী আন্দোলনত ব্যাপক হাৰত ছাত্ৰ সংগঠন জড়িত হৈ অহাৰ সময়তে বিশ্বনাথত সংগ্ৰামী যুৱ ছাত্ৰ পৰিষদ নামৰ এটা ছাত্ৰ সংগঠনৰ কেইবাজনো সদস্যই আজি ভাৰতীয় জনতা পাৰ্টিত যোগদান কৰিছে।

সংগঠনটোৰ কেন্দ্ৰীয় সমিতিৰ সাংগঠনিক সম্পাদক বিজিত শইকীয়া, বিশ্বনাথ জিলাৰ সাংগঠনিক সম্পাদক পংকজ গুপ্তা, প্ৰাক্তন কংগ্ৰেছ দলৰ নেত্ৰী লাৱণ্য গগৈ আৰু বহুকেইজন লোকে বিজেপিত যোগদান কৰিছে।

বিজেপিৰ বিশ্বনাথ নগৰ মণ্ডলৰ সভাপতি কোষেশ্বৰ বৰাৰ সভাপতিত্বত অনুষ্ঠিত হোৱা এই যোগদান কাৰ্য্যসূচীত উপস্থিত থাকে বিশ্বনাথ সমষ্টিৰ বিধায়ক প্ৰমোদ বৰঠাকুৰ, বিশ্বনাথ চাৰিআলি পৌৰ সভাৰ পৌৰপতি ৰুলী শৰ্মাসহ ভাৰতীয় জনতা পাৰ্টি বিশ্বনাথ জিলাৰ কেইবাজনো বিষয়ববীয়া।

আনহাতে বিজেপিৰ বিশ্বনাথৰ এটা সূত্ৰৰ দাবী, আৰু বহু সংখ্যক লোকে শীঘ্ৰেই গেৰুৱা দলটোত যোগদান কৰাৰ সম্ভাৱনা আছে।