দুদিনীয়া আৰক্ষী জিম্মাৰ অন্তত পুনৰ ডিব্ৰুগড়ৰ কাৰাগাৰলৈ প্ৰেৰণ অমৃতপাল সিঙক
ৱাৰিছ পঞ্জাৱ দেৰ মুৰব্বী তথা খডুৰ চাহিবৰ সাংসদ অমৃতপাল সিঙক দুদিনীয়া আৰক্ষী জিম্মাৰ অন্তত আজি পুনৰ ডিব্ৰুগড় কেন্দ্ৰীয় কাৰাগাৰলৈ প্ৰেৰণ কৰা হয়। ডিব্ৰুগড় আৰক্ষী থানাত জেৰা সমাপ্ত হোৱাৰ পিছত ২৫ এপ্ৰিলত তেওঁক পুনৰ জেললৈ লৈ যোৱা হয়।
ৰাষ্ট্ৰীয় নিৰাপত্তা আইনৰ অধীনত থকা আটকৰ ম্যাদ ওকলাৰ পিছত পঞ্জাৱ আৰক্ষীয়ে তেওঁক পুনৰ গ্ৰেপ্তাৰ কৰিছিল আৰু শুকুৰবাৰে তেওঁক ভিডিঅ’ কনফাৰেন্সিঙৰ জৰিয়তে আদালতত হাজিৰ কৰোৱা হয়।
২০২৪ চনৰ ফেব্ৰুৱাৰী মাহত ডিব্ৰুগড়ৰ কাৰাগাৰৰ ভিতৰত থকা এনএছএ চেলৰ পৰা কিছুমান অননুমোদিত ইলেক্ট্ৰনিক যন্ত্ৰ উদ্ধাৰ হোৱাৰ সন্দৰ্ভত এক গোচৰ ৰুজু কৰা হৈছিল। এই গোচৰৰ ভিত্তিতেই ন্যায়িক দণ্ডাধীশ চন্দন শইকীয়াৰ আদালতত অমৃতপাল সিঙৰ শুনানি গ্ৰহণ কৰা হয়।
আৰক্ষী থানাৰ পৰা কটকটীয়া নিৰাপত্তাৰ মাজত সিঙক আদালতত হাজিৰ কৰোৱাৰ লগতে তেওঁৰ ৯ জন সহযোগীকো গোবিন্দৱাল, ভাতিন্দা আৰু পাটিয়ালা জেলৰ পৰা ভিডিঅ’ কনফাৰেন্সিঙৰ জৰিয়তে শুনানি প্ৰক্ৰিয়াত অন্তৰ্ভুক্ত কৰা হয়।
কাৰাগাৰৰ দৰে উচ্চ নিৰাপত্তাৰ মাজতো কেনেকৈ এই যোগাযোগ যন্ত্ৰসমূহ ব্যৱহাৰ কৰা হৈছিল সেই লৈ কাৰাগাৰৰ নিৰাপত্তা আৰু নিৰীক্ষণৰ ওপৰত প্ৰশ্ন উত্থাপন হৈছে। উল্লেখ্য যে ২০২৩ চনত পঞ্জাৱ আৰক্ষীৰ বিশেষ অভিযানৰ সময়ত অমৃতপাল সিঙক এনএছএৰ অধীনত আটক কৰি ডিব্ৰুগড় জেললৈ অনা হৈছিল। শেহতীয়াকৈ তেওঁৰ তিনি বছৰীয়া কাৰাবাসৰ সময়সীমা শেষ হোৱাৰ বাবে পঞ্জাৱ আৰক্ষীয়ে পুৰণি গোচৰৰ ভিত্তিত তেওঁক পুনৰ গ্ৰেপ্তাৰ কৰি আইনী প্ৰক্ৰিয়া আগবঢ়াই নিছে।