পঞ্জাৱৰ একেটা শৰীৰতে সংযুক্ত যমজ ভাতৃদ্বয়ে লাভ কৰিলে চৰকাৰী চাকৰি
অমৃতসৰৰ সংযুক্ত যমজ সন্তান চোহনা-মোহনাই লাভ কৰিছে এক অনন্য কৃতিত্ব। সদায়ে আত্মনিৰ্ভৰশীল হ’বলৈ আগ্ৰহী ১৯ বছৰীয়া যুৱক দুজনে পঞ্জাৱ ষ্টেট পাৱাৰ কৰ্পোৰেচন লিমিটেড (পিএছপিচিএল)ত চাকৰি লাভ কৰিছে।
আইটিআইৰ পৰা ডিপ্লোমা (ইলেক্ট্ৰিচিয়ান) ধাৰণ কৰা চোহনা-মোহনাই ৬৬-কেভি পিএছপিচিএল কাৰ্যালয়ত নিয়মীয়া টি মেট হিচাপে তেওঁলোকৰ কৰ্তব্যত আনুষ্ঠানিকভাৱে যোগদান কৰে। তেওঁলোকে যোগান নিয়ন্ত্ৰণ কক্ষত কাম কৰিব বুলি কাৰ্যালয়ৰ এজন বিষয়াই কয়।
“আমি জানিব পাৰিছিলো যে আটাইতকৈ বিৰল বিশেষ ভাৱে সক্ষম যুৱক দুজনে আইটিআইত ডিপ্লোমা কৰি আছিল আৰু ইলেক্ট্ৰিচিয়ান হিচাপে কেৰিয়াৰ গঢ়িব বিচাৰিছিল। আমি তেওঁলোকৰ কাষ চাপিছিলো আৰু তেওঁলোকক অতি সক্ৰিয় যেন অনুভৱ কৰিছিলো। যমজ যুৱকদ্বয়ৰ ভাল কাৰিকৰী জ্ঞান আছে। সেয়েহে, আমি তেওঁলোকক সহানুভূতিৰ ভিত্তিত বিশেষ ভাৱে সক্ষম ব্যক্তিৰ কোটাৰ অধীনত আমাৰ বিভাগত নিযুক্তি দিয়াৰ সিদ্ধান্ত লৈছো।” পিএছপিচিএলৰ চিএমডি বেণু পাৰচাদে কয়।
চোহনা-মোহনাই কয় যে তেওঁলোকক এই সুযোগ প্ৰদান কৰাৰ বাবে তেওঁলোক পঞ্জাৱ চৰকাৰৰ ওচৰত কৃতজ্ঞ। “আমি অতি আন্তৰিকতা আৰু নিষ্ঠাৰে কঠোৰ পৰিশ্ৰম কৰিম।” চোহনাই কয়।
“আমি পিঙ্গালৱাৰা প্ৰতিষ্ঠানৰ প্ৰতি গভীৰভাৱে কৃতজ্ঞ যিয়ে আমাক ডাঙৰ-দীঘল কৰিছে, আমাক শিক্ষিত কৰিছে আৰু আমাক আত্মনিৰ্ভৰশীল হোৱাত সহায় কৰিছে।” মোহনাই কয়।
উল্লেখ্য যে যমজ ভাতৃদ্বয়ৰ দুটা হৃদযন্ত্ৰ, দুযোৰ বাহু, বৃক্ক আৰু মেৰুদণ্ড আছে, কিন্তু এটা যকৃত, পিত্তথলী, প্লীহা আৰু এযোৰেই ভৰি আছে। ২০০৩ চনৰ ১৪ জুনত নতুন দিল্লীৰ সুচেতা কৃপলানি চিকিৎসালয়ত জন্ম গ্ৰহণ কৰা তেওঁলোকক তেওঁলোকৰ পিতৃ-মাতৃয়ে এৰি দিছিল।
পিছত তেওঁলোকক এইমছলৈ স্থানান্তৰ কৰা হৈছিল য’ত চিকিৎসকসকলে তেওঁলোকক পৃথক নকৰাৰ সিদ্ধান্ত লৈছিল। পৃথক কৰিলে যিকোনো এজনৰ জীৱন হেৰুওৱাৰ লগতে ভাস্কুলাৰ আৰু স্নায়বিক ক্ষতি হ’ব পাৰে বুলি আশংকা প্ৰকাশ কৰে চিকিৎসকে।