গুৱাহাটীত লকডাউনৰ মাজত এম্বুলেঞ্চত শাক-পাচলি, মুৰ্গী!

আপুনি যদি ভাবিছে, কেৱল ৰোগী কঢ়িয়াবৰ বাবেই ব্যৱহাৰ হয় এম্বুলেঞ্চ? নহয়, আপোনাৰ এই ধাৰণাক ভুল প্ৰমাণিত কৰিব মহানগৰীত দিন-দুপৰতে সংঘটিত হোৱা এটা ঘটনাই।

কিয়নো এতিয়া ৰোগীৰ উপৰিও এম্বুলেঞ্চ ব্যৱহাৰ কৰা হয় শাক-পাচলি, মুৰ্গী কঢ়িওৱাৰ কামত।

মহানগৰীৰ গণেশগুৰিত  সংঘটিত হৈছে এনে এক আজৱ কাণ্ড।

দিন দুপৰতে ৰোগীৰ পৰিৱৰ্তে কোনো দুষ্ট লোকে ব্যক্তিগত এম্বুলেঞ্চত কঢ়িয়াই আনিলে বস্তাই বস্তাই আলু, নেমু, পটল, ৰঙালাও, ভাতকেৰেলা, মুৰ্গী ইত্যাদি।

কেৱল কঢ়িয়াই অনাই নহয়, দিছপুৰ হাস্পাতাললৈ সোমাই যোৱা পথচোৱাত বহু সময়  দুজন লোকে বিক্ৰী কৰি থকাও প্ৰত্যক্ষ কৰে স্থানীয় ৰাইজে।

তাৰ পাছতে স্থানীয় লোকসকলে খবৰ দিয়ে দিছপুৰ আৰক্ষীক।

দিছপুৰ আৰক্ষী ঘটনাস্থলীত উপস্থিত হোৱাৰ উমান পাই পলাই পত্ৰ্ং দিয়ে দুয়োজন লোকে।

পলায়ন কৰা সুবিধাবাদী লোক দুজনক বিচাৰি ইতিমধ্যে দিছপুৰ আৰক্ষীয়ে আৰম্ভ কৰিছে অভিযান।

জব্দকৃত এম্বুলেঞ্চখনৰ নম্বৰ  AS01JC 8718 ।  লকডাউনৰ সময়ছোৱাত এনেদৰেই জৰুৰীকালীন সেৱাৰ লগত জড়িত বাহনৰ অপব্যৱহাৰ কৰিছে একাংশ সুবিধাবাদীয়ে।

অৱশ্যে, দিছপুৰ থানাৰ অতিৰিক্ত আৰক্ষী আয়ুক্ত হিমাংশু প্ৰসাদ দাসে জনোৱা অনুসৰি এতিয়াৰে পৰা এনে জৰুৰীকালীন সেৱাৰ লগত জড়িত বাহন আৰু ব্যক্তিগত এম্বুলেঞ্চ তালাচী চলাইহে যাবলৈ দিব দিছপুৰ আৰক্ষীয়ে।