বোকাখাতত ৩৭ নং ৰাষ্ট্ৰীয় পথতে জ্বলি উঠিল কাপোৰ ভৰ্তি ট্ৰাক

বোকাখাতৰ সমীপৰ সাপজুৰিত আজি পুৱা ৩৭ নং ৰাষ্ট্ৰীয় পথৰ ওপৰতে দাউ দাউ কৈ জ্বলি উঠে এখন মালবাহী ট্ৰাক।ৰাষ্ট্ৰীয়পথত ৰখাই থোৱা অৱস্থাতে হঠাৎ ট্ৰাকখন জ্বলি উঠা দেখি তাত উপস্থিত লোকসকলৰ মাজত হুলস্থলীয়া পৰিৱেশৰ সৃষ্টি হয়।

এ এছ ০১ ডি ডি ৪১৭৪ নম্বৰৰ কাপোৰ ভৰ্তি ট্ৰাকখন গুৱাহাটীৰ পৰা তিনিচুকীয়ালৈ গৈ আছিল বুলি জানিব পৰা গৈছে।

ট্ৰাকখনত হোৱা অগ্নিকাণ্ডৰ কাৰণ এতিয়াও জানিব পৰা হোৱা নাই যদিও যান্ত্ৰিক বিজুতিৰ বাবেই ট্ৰাকখন জ্বলি উঠা বুলি চালকৰ লগতে আন একাংশই সন্দেহ প্ৰকাশ কৰিছে। 

উল্লেখ্য যে ট্ৰাকখনৰ চালক মন্টু তাঁতীৰ ঘৰ সাপজুৰিতে হোৱাৰ বাবে তেওঁ অলপ সময়ৰ বাবে গাড়ীখন ৰখাই ঘৰলৈ গৈছিল। সেই সময়তেই ট্ৰাকখনত জুই লাগে।

ইফালে ট্ৰাকখন হঠাৎ জ্বলি উঠা দেখি স্থানীয় লোকে অগ্নি নিৰ্বাপক বাহিনীক খবৰ দিয়ে আৰু লগে লগে ঘটনাস্থলত উপস্থিত হোৱা অগ্নিনিৰ্বাপক বাহিনীৰ গাড়ীয়ে জুই নুমুৱাবলৈ সক্ষম হয় ৷

দুৰ্ঘটনাত কোনো লোক হতাহত হোৱা নাই।