আমেৰিকাত পুনৰ ভাৰতীয় ছাত্ৰৰ মৃতদেহ উদ্ধাৰঃ হত্যাৰ সন্দেহ পৰিয়ালৰ
আমেৰিকা যুক্তৰাষ্ট্ৰত পুনৰ উদ্ধাৰ হৈছে এগৰাকী ভাৰতীয় ছাত্ৰৰ মৃতদেহ। নিহত ছাত্ৰগৰাকীক অন্ধ্ৰ প্ৰদেশৰ গুন্টুৰ জিলাৰ অভিজিত পাৰুচুৰু বুলি চিনাক্ত কৰা হৈছে। নিহত পাৰুচুৰু বষ্টন বিশ্ববিদ্যালয়ৰ এজন অভিযান্ত্ৰিক বিদ্যাৰ্থী আছিল।
বিশ্ববিদ্যালয়ৰ সমীপৰ এখন অৰণ্যত পাৰুচুৰুৰ মৃতদেহ উদ্ধাৰ হোৱা বুলি জানিব পৰা গৈছে। ইফালে ছাত্ৰগৰাকীৰ মৃতদেহ উদ্ধাৰ হোৱাৰ পিছতে পৰিয়ালে তেওঁক হত্যা কৰা হৈছিল বুলি অভিযোগ উত্থাপন কৰিছে।
পৰিয়ালৰ অভিযোগ মতে, ১১ মাৰ্চত বিশ্ববিদ্যালয় চৌহদত অচিনাক্ত ব্যক্তিয়ে তেওঁক হত্যা কৰিছিল আৰু তেওঁৰ মৃতদেহ এখন গাড়ীত তুলি অৰণ্যত পেলাই থৈ অহা হৈছিল। অৱশ্যে নিউয়ৰ্কত থকা ভাৰতীয় দূতাবাসে প্ৰাৰম্ভিক অনুসন্ধানৰ পিছত এনে সন্দেহজনক দিশ অস্বীকাৰ কৰিছে।
দূতাবাসে লগতে পাৰুচুৰুৰ পাৰুচুৰুৰ দুৰ্ভাগ্যজনক মৃত্যুত দুখ প্ৰকাশ কৰি ছাত্ৰজনৰ পৰিয়ালৰ সৈতে সম্পৰ্কত থকা বুলি সদৰী কৰে। উল্লেখ্য যে নিহত অভিজিত পাৰুচুৰু তেওঁৰ পিতৃ-মাতৃ, পাৰুচুৰী চক্ৰধৰ আৰু শ্ৰীলক্ষ্মীৰ একমাত্ৰ পুত্ৰ আছিল।
প্ৰকাশিত খবৰ অনুসৰি শৈশৱৰ পৰাই মেধাৱী অভিজিতে বিদেশত পঢ়িবলৈ লোৱা সিদ্ধান্তত প্ৰথমে তেওঁৰ মাতৃ সন্মত হোৱা নাছিল। অৱশ্যে সন্তানৰ ভৱিষ্যতৰ স্বাৰ্থত তেওঁ পিছত সন্মতি প্ৰকাশ কৰিছিল। পুত্ৰৰ মৃত্যুৰ খবৰ লাভ কৰাৰ পিছতে ভাগি পৰে দম্পতীহাল।
লক্ষণীয়ভাৱে শেহতীয়াকৈ আমেৰিকাত ভাৰতীয় বা ভাৰতীয় মূলৰ ছাত্ৰৰ ক্ষেত্ৰত এনে ঘটনা বৃদ্ধি পোৱাক লৈ চাঞ্চল্যৰ সৃষ্টি হৈছে। অভিজিত পাৰুচুৰুৰ ঘটনা চলিত বৰ্ষত এইপৰ্যন্ত ভাৰতীয় বা ভাৰতীয় মূলৰ ছাত্ৰৰ ক্ষেত্ৰত আমেৰিকাত এনে নৱম ঘটনা।