মাত্ৰ ৩০ মিনিটৰ ভিতৰতে কৰ’নাৰ পৰীক্ষাৰ ফলাফল; প্ৰথমবাৰৰ বাবে ব্যৱহাৰ হৈছে এই পদ্ধতি
কৰ’না ভাইৰাছৰ পৰীক্ষাৰ পাছত সাধাৰণতে ইয়াৰ ফলাফলৰ বাবে এক দীঘলীয়া সময় অপেক্ষা কৰিবলগীয়া হয়।
কিন্তু বিজ্ঞানীসকলে এই সমস্যাৰো এক সমাধান আনিছে। এতিয়া নমুনা দিয়াৰ মাত্ৰ আধা ঘন্টাৰ ভিতৰতে লাভ কৰিব পৰা যাব পৰীক্ষাৰ ফলাফল।
দিল্লী চৰকাৰে ৰেপিড এন্টিজেন পদ্ধতিৰ জৰিয়তে কোভিড-১৯ৰ বাবে পৰীক্ষা আৰম্ভ কৰিছে।
এন্টিজেন পৰীক্ষাত মুঠ ৩৪১টা টীম জড়িত আছে আৰু এই পৰীক্ষাত ৩০ মিনিটৰ ভিতৰতে ফলাফল পোৱা যাব।
দিল্লীৰ দুৰ্যোগ ব্যৱস্থা কৰ্তৃপক্ষই জানিবলৈ দিয়া মতে এইমছ আৰু আইচিএমআৰৰ অনুমোদনৰ পাছত বিভিন্ন কেন্দ্ৰত পৰীক্ষা কৰোতাসকলক এখন প্ৰমান পত্ৰ প্ৰদান কৰা হ’ব।
কেন্দ্ৰীয় মন্ত্ৰী জী কিষান ৰেড্ডীয়ে কয় যে কেন্দ্ৰীয় চৰকাৰ এই আঁচনি ৰাষ্ট্ৰীয় ৰাজধানীত তৈয়াৰ কৰা ১৬৯টা পৰীক্ষা কেন্দ্ৰত ছয় লাখ ৰেপিড এন্টিজেন কোভিড-১৯ৰ পৰীক্ষা কৰাৰ বাবে সক্ষম।
ইপিনে, মুখ্য মন্ত্ৰী অৰবিন্দ কেজৰিৱালে টুইট কৰি কয়,’’আজি দুটা গুৰুত্বপূৰ্ণ কাম হৈছে। দিল্লীত কোভিড-১৯ৰ পৰীক্ষাৰ মূল্য হ্ৰাস কৰি ২৪০০টকা কৰা হৈছে আৰু ৰেপিড এন্টিজেন পৰীক্ষা আৰম্ভ হৈছে। আশা কৰো লোকসকলে এতিয়া পৰীক্ষা কৰাবৰ বাবে কোনো সমস্যাৰ সন্মুখীন হ’বলগীয়া নহ’ব।‘’
আইচিএমআৰৰ মতে কোভিড-১৯ৰ বাবে ৰেপিড এন্টিজেন পৰীক্ষাত নিগেটিভ অহা সন্দেহজনক লোকসকলৰ আৰ টি-পিচিআৰ পৰীক্ষাও কৰোৱা উচিত।
আনহাতে, ইয়াত পজিটিভ পোৱা লোকসকলক আক্ৰান্ত বুলি বুজা যাব আৰু তেওঁলোকৰ আৰ টি-পিচিআৰ পৰীক্ষাৰ প্ৰয়োজন নহ’ব।
দিল্লীত এই পদ্ধতি সফল হোৱাৰ পাছত অধিক সংক্ৰমণ ঘটা স্থানসমূহতো এই পদ্ধতি অৱলম্বন কৰাৰ সম্ভাৱনা আছে।