জানেনে আপুনি? মুকেশ আম্বানিৰ পিছত দ্বিতীয় চহকী ভাৰতীয়জন কোন?

আটাইতকৈ চহকী ভাৰতীয়জন বাৰু মুকেশ আম্বানি বুলি প্ৰায় সকলোৱেই জানে। কি্ন্তু মুকেশ আম্বানিৰ পিছত দ্বিতীয় চহকী ভাৰতীয় কোন?

হয়, আচৰিত হ’ব যে আপোনাৰ তেনেই অপৰিচিত হ’লেও এইজন লোক ঈৰ্ষণীয়ভাৱে চহকী অথচ নাই লাইমলাইটত।

তেওঁ হ’ল এভিনিউ ছুপাৰমাৰ্টছৰ প্ৰতিষ্ঠাতা ৰাধাকিষাণ ডামানী। বৰ্তমান ডামানীয়েই হ’ল দ্বিতীয় সৰ্বাধিক চহকী ভাৰতীয়।

গৌতম আদানী, লক্ষ্মী মিট্টাল, ৰতন টাটা, শিৱ নাদাৰ, বেংকাৰ উদয় কটক আৰু কুমাৰ মংগলম বিৰলাৰ দৰে বৃহৎ নামবোৰক পিছ পেলাই ডামানীয়ে শেহতীয়াকৈ তালিকাৰ দ্বিতীয় স্থানলৈ আহে।

তেওঁৰ মুঠ সম্পত্তিৰ পৰিমাণ হ’ল ১৭.৯ বিলিয়ন ডলাৰ (ফ’ৰ্বছৰ ৰিয়েল টাইম বিলিয়নাৰছ ইণ্ডেক্সৰ মতে)।

এই ইণ্ডেক্সৰ মতে, মুকেশ আম্বানিৰ মুঠ সম্পত্তিৰ পৰিমাণ ৫৭.৯ বিলিয়ন ডলাৰ।

শুকুৰবাৰে এভিনিউ ছুপাৰমাৰ্টছৰ শ্বেয়াৰ বোম্বেই ষ্টক মাৰ্কেটত সৰ্বকালৰ উচ্চ স্তৰলৈ উঠাৰ পিছত ৰাধাকৃষাণ আৰু তেওঁৰ পৰিয়ালৰ শুকুৰবাৰে সম্পত্তিৰ পৰিমাণ প্ৰায় ৯৬ মিলিয়ন বৃদ্ধি হোৱা দেখা যায়, যিটোৰ হাৰ ০.৫৪ শতাংশ।

এভিনিউ ছুপাৰমাৰ্টছে ৫ ফেব্ৰুৱাৰিত প্ৰতিষ্ঠানিক বিনিয়োগকাৰীসকলৰ বাবে শ্বেয়াৰ বিক্ৰীৰ কথা ঘোষণা কৰিছিল। কোম্পানিটোৱে অফাৰ ফৰ ছেইলৰ জৰিয়তে ২.২৮ শতাংশ ইয়াৰ ষ্টেক বিক্ৰী কৰিব।

অফাৰ ফৰ ছেইলে এভিনিউ ছুপাৰমাৰ্টছলৈ প্ৰায় ৩,০৩২.৫ কোটি টকা আনিব বুলি আশা কৰা হৈছে, য’ত কোম্পানিটোৱে ১.৪৮ কোটি অংশ নিৰ্বিনিয়োগ কৰিবলৈ সিদ্ধান্ত কৰিছিল।

খুচুৰা বিনিয়োগকাৰীৰ বাবে অফাৰ ফৰ ছেইল অহা ১৭ ফেব্ৰুৱাৰিত মুকলি কৰা হ’ব আৰু খুচুৰা-ভিন্ন বিনিয়োগকাৰীৰ বাবে ইয়াক ১৪ ফেব্ৰুৱাৰিত মুকলি কৰা হ’ব।

এভিনিউ ছুপাৰমাৰ্টছৰ ১৯৬ টা ষ্ট’ৰ আছে আৰু ভাৰতত সৰ্বাধিক লাভজনক গেলামালৰ খুচুৰা বিক্ৰীৰ শৃংখলাবোৰৰ অন্যতম।