আঘোণৰ পথাৰত নামিছে জাক জাক হাতী, কৃষকক সকাহ দিবলৈ আৰণ্যকৰ চাৰ্জ লাইট বিতৰণ

আঘোণৰ পথাৰত ধান চপাবৰ সময়ত জাক জাক হাতী নামিছে বোকাখাত মহকুমাৰ কাৰ্বি আংলং জিলাৰ সীমান্তৰ গেলেকা বালিজান আৰু লখৌজান অঞ্চলত ৷

যাৰ বাবে সমস্যাত পৰিছে অঞ্চলৰ খেতিয়কসকল ৷

খেতিয়কৰ এই সমস্যা সমাধান কৰি পথাৰৰ ধান চপাোৱাত সহায় কৰিবৰ বাবে ৰাজ্যৰ আগশাৰীৰ প্ৰকৃতি সংগঠন আৰণ্যকে দুয়োটা অঞ্চলৰ খেতিয়কৰ মাজত ১০ টাকৈ উচ্চ প্ৰযুক্তিৰ চাৰ্জ কৰিব পৰা লাইট বিতৰণ কৰিছে ৷

এই উপলক্ষে বুধবাৰে বিয়লি গেলেকা বালিজান আৰু লখৌজান চাহ বাগিচাৰ প্ৰাথমিক বিদ্যালয় প্ৰাংগনত আয়োজিত সজাগতা সভাত অতিৰিক্ত আৰক্ষী অধীক্ষক ধ্ৰুৱজ্যোতি নাথ, আৰণ্যকৰ জ্যেষ্ঠ প্ৰৱন্ধক মানস কুমাৰ ভট্টাচাৰ্য, প্ৰকৃতিপ্ৰেমী তথা জ্যেষ্ঠ সাংবাদিক উত্তম শইকীয়া, বোকাখাত বনাঞ্চলৰ বন বিষয়া শশাংক শইকীয়া আৰু ৰাজেন পানিকা উপস্থিত থাকে৷

অনুষ্ঠানত স্থানীয় খেতিয়কৰ উপৰি গাওঁৰক্ষী বাহিনীৰ বিষয়ববীয়াও উপস্থিত থাকে ৷

গেলেকা বালিজান আৰু লখৌজান অনুষ্ঠানৰ আঁত ধৰে ক্ৰমে টংকেশ্বৰ বৰাইক আৰু অংকুৰ নাহকে ৷

অনুষ্ঠানত স্থানীয় খেতিয়কে অঞ্চলটোত হোৱা হাতীৰ উপদ্ৰৱ আৰু খেতিয়কে সন্মুখীন হোৱা সমস্যা সমূহ দাঙি ধৰাৰ উপৰি খেতি চপোৱাৰ সময়ত লাইটৰ ব্যৱস্থা কৰাৰ বাবে আৰণ্যকক ধন্যবাদ জ্ঞাপন কৰে ৷