৭-৮ ঘণ্টা শুই উঠাৰ পিছতো চকুৰ তলত কলা দাগ পৰিছে নেকি? জানি লওক কেতিয়া ডাক্তৰৰ কাষ চপা উচিত

বহুলোকে ভাবে যে চকুৰ তলত পৰা কলা দাগ বা ডাৰ্ক চাৰ্কল কেৱল টোপনি ক্ষতি হোৱাৰ বাবে হয়। সেয়েহে নিয়মীয়াকৈ ৭-৮ ঘণ্টা শুই উঠাৰ পিছতো যেতিয়া আইনাত চকুৰ তলত কলা দাগ দেখা পায়, তেতিয়া নিৰাশ হোৱাটো স্বাভাৱিক। কিন্তু চিকিৎসকসকলৰ মতে, ইয়াৰ কাৰণ কেৱল টোপনিৰ অভাৱেই নহয়। বংশগত কাৰণ, বয়স, এলাৰ্জি, শৰীৰত পানীৰ অভাৱ, অত্যাধিক সময় স্ক্ৰীণত চোৱা আৰু কিছুমান ভিটামিন বা খনিজ পদাৰ্থৰ অভাৱৰ বাবেও এই সমস্যা হ’ব পাৰে। সেয়েহে দামি ক্ৰীম সনাৰ আগতে ইয়াৰ প্ৰকৃত কাৰণটো বিচাৰি উলিওৱাটো অতি প্ৰয়োজনীয়।

টোপনি কম হ’লে চকুৰ তলৰ কলা দাগ বেছি স্পষ্ট হৈ পৰিব পাৰে, কিন্তু এয়াই একমাত্ৰ কাৰণ নহয়। ছালৰ যত্ন সম্পৰ্কীয় এখন গৱেষণা পত্ৰৰ মতে, ডাৰ্ক চাৰ্কলৰ আঁৰত বহুতো কাৰণ থাকিব পাৰে আৰু সকলোৰে ক্ষেত্ৰত এই কাৰণ একে নহয়। পৰিয়ালৰ আন সদস্যৰ চকুৰ তলত এনে দাগ থাকিলে ই বংশগত কাৰণতো হ’ব পাৰে। বহুতো লোকৰ চকুৰ তলৰ ছাল স্বাভাৱিকতেই পাতল আৰু সংবেদনশীল হয় যাৰ বাবে ৰক্তনলীবোৰ নীলা বা বেঙুনীয়া ৰঙৰ দেখা যায় আৰু মানুহে ইয়াক ডাৰ্ক চাৰ্কল বুলি ভাৱে। ইয়াৰ উপৰিও ধূলি বা বতৰৰ পৰিৱৰ্তনৰ বাবে হোৱা এলাৰ্জিৰ ফলতো চকুৰ চাৰিওফালে ফুলি উঠিব পাৰে আৰু সঘনাই চকু খজুৱাই থকাৰ অভ্যাস থাকিলেও সমস্যা বৃদ্ধি পায়।

বয়স বঢ়াৰ লগে লগে ছালৰ গঠন সলনি হৈ চকুৰ তলত ছাঁৰ দৰে পৰে। দিনটোৰ সৰহভাগ সময় মোবাইল বা লেপটপৰ আগত কটালে চকুৰ ওপৰত অতিৰিক্ত চাপ পৰে আৰু চকু শুকান তথা ভাগৰুৱা হৈ পৰে। আইৰণ, ভিটামিন বি১২, বা ভিটামিন কে আদিৰ দৰে পুষ্টিৰ অভাৱ হ’লেও ছাল শেঁতা পৰে আৰু চকুৰ তলৰ ৰক্তনলীবোৰ স্পষ্ট হৈ পৰে। আনহাতে, শৰীৰত পানীৰ পৰিমাণ কমি গ’লে বা অত্যাধিক ৰ’দত ওলালে ছালত মেলানিন বৃদ্ধি পাই চকুৰ তলৰ কলা দাগ বেছি গাঢ় কৰি তোলে।

সকলো ধৰণৰ কলা দাগ একে নহয়। কিছুমান অত্যাধিক মেলানিনৰ বাবে হয়, কিছুমান ৰক্তনলীৰ বাবে আৰু আন কিছুমান চকুৰ গঠন বা বয়সৰ বাবে হয়। এই সমস্যা দূৰ কৰিবলৈ কেৱল টোপনি বঢ়োৱাই যথেষ্ট নহয়, জীৱনধাৰণৰ কিছুমান পৰিৱৰ্তনৰো প্ৰয়োজন। এলাৰ্জি থাকিলে চিকিৎসা কৰোৱা, পুষ্টিকৰ খাদ্য গ্ৰহণ কৰা, পৰ্যাপ্ত পৰিমাণে পানী খোৱা, ৰ’দত ওলালে ছানস্ক্ৰীণ ব্যৱহাৰ কৰা আৰু মাজে মাজে স্ক্ৰীণৰ পৰা বিৰতি লোৱাটো অতি দৰকাৰী। প্ৰয়োজনবোধে চিকিৎসকৰ পৰামৰ্শ মতে সঠিক ছালৰ যত্ন লোৱা সামগ্ৰী ব্যৱহাৰ কৰিব পাৰে।

যদি হঠাতে চকুৰ তলৰ কলা দাগ বহুত বেছি হৈ যায় বা ইয়াৰ লগত অত্যাধিক ভাগৰ, ৰক্তহীনতাৰ লক্ষণ, দীৰ্ঘদিনীয়া এলাৰ্জি বা ছালৰ আন কিবা সমস্যা দেখা দিয়ে, তেন্তে পলম নকৰি লগে লগে চিকিৎসকৰ কাষ চাপিব লাগে। কিয়নো, বহু সময়ত এই সমস্যা কেৱল সৌন্দৰ্যৰ সমস্যাই নহয়, ই শৰীৰৰ ভিতৰত লুকাই থকা আন কোনো স্বাস্থ্যজনিত সমস্যাৰো ইংগিত হ’ব পাৰে।