সেনা সাজু : পাক অধিকৃত কাশ্মীৰ ভাৰতে দখল কৰা সন্দৰ্ভত কি ক’লে সেনাৰ মুৰব্বীয়ে?

পাকিস্তানে অবৈধভাৱে দখল কৰি ৰখা জম্মু-কাশ্মীৰক লৈ কেন্দ্ৰীয় মন্ত্ৰী জিতেন্দ্ৰ সিঙৰ বক্তব্যৰ পাছত ভাৰতীয় সেনাৰ মুৰব্বী জেনেৰেল বিপিন ৰাৱাটে দিছে এক গুৰুত্বপূৰ্ণ ইংগিত।

সেনাৰ মুৰব্বী গৰাকীয়ে এই সন্দৰ্ভত সিদ্ধান্ত চৰকাৰে ল’ব লাগিব বুলি উল্লেখ কৰি কয় যে দেশৰ সংস্থাসমূহে চৰকাৰৰ আদেশ অনুসৰিয়েই কাম কৰে।

তেওঁ লগতে কয় যে সেনা যিকোনো আদেশ তথা অভিযানৰ বাবে সদায় সাজু আছে।

উল্লেখযোগ্য যে জিতেন্দ্ৰ সিঙে তেওঁ বক্তৱ্যত কৈছিল যে পৰৱৰ্তী কাৰ্যসূচী হৈছে পাক্ অধিকৃত কাশ্মীৰক পুনৰ হাতলৈ অনাটো।

মোদী চৰকাৰৰ ১০০ দিন সম্পূৰ্ণ হোৱাৰ আটাইতকৈ ডাঙৰ কৃতিত্বৰ কথা ক’বলৈ গৈ তেওঁ কৈছিল যে আমাৰ পৰৱৰ্তী কাৰ্যসূচী হৈছে পাকিস্তানৰ দখলত থকা কাশ্মীৰক ভাৰতৰ অভিন্ন অংগ কৰি তোলা।

তাৎপৰ্যপূৰ্ণভাৱে তেওঁ কয়,’’এয়া কেৱল মোৰ বা আমাৰ দলৰ প্ৰতিশ্ৰুতি নহয়, বৰঞ্চ ১৯৯৪’ত পি ভি নৰসিংহ ৰাও নেতৃত্বৰ তৎকালীন কংগ্ৰেছ চৰকাৰৰ দ্বাৰা সৰ্বসন্মতি সাপেক্ষে গ্ৰহণ কৰা সংকল্পও।‘’

সংবিধান অনুচ্ছেদ ৩৭০’ৰ বেছিভাগ ব্যৱস্থা সমাপ্ত কৰাৰ পাছত পাকিস্তানৰ ফালৰ পৰা চলোৱা অপপ্ৰচাৰ সন্দৰ্ভত সিঙে কয় যে বিশ্বৰ স্থিতি বৰ্তমান ভাৰতৰ অনুকুলে আছে।

তেওঁ কয়,’’কিছুমান দেশৰ স্থিতি ভাৰতৰ সপক্ষে নাছিল, এতিয়া তেওঁলোকেও আমাৰ স্থিতিৰ সৈতে সহমত পোষণ কৰিছে।‘’

ইয়াৰ মাজতে সেনাৰ মুৰব্বী গৰাকীয়ে কয় যে পাক্ অধিকৃত কাশ্মীৰ সন্দৰ্ভত চৰকাৰে যি সিদ্ধান্ত গ্ৰহণ কৰে সেনা বাহিনীয়ে সেই অনুসৰিয়েই কাম কৰিব।

সেনাৰ প্ৰস্তুতি সম্পৰ্কত সেনা মুৰব্বীগৰাকীয়ে কয় যে চৰকাৰৰ যিকোনো অভিযানৰ বাবে সেনা সম্পূৰ্ণ সাজু আছে।