ৰাষ্ট্ৰীয় ঘাইপথত কৃত্রিম বান : মেচাৰ্ছ দিনেশ চন্দ্ৰ কামাখ্যা হাইৱে কনচেছন প্ৰাইভেট লিমিটেডক জগৰীয়া প্ৰশাসনৰ
খনাপাৰাৰ পৰা জালুকবাৰীলৈকে ৰাষ্ট্ৰীয় ঘাইপথত হোৱা কৃত্ৰিম বানৰ সমস্যাৰ বাবে এইবাৰ গুৱাহাটী জিলা প্ৰশাসনে এক বিশেষ নিৰ্মাণকাৰী সংস্থাক কাৰণ দৰ্শাবলৈ জাননী জাৰি কৰিছে। কামৰূপ মহানগৰ জিলাৰ উপায়ুক্তৰ কাৰ্যালয়ৰ অধীনস্থ জিলা দুৰ্যোগ ব্যৱস্থাপনা প্ৰাধিকৰণে এই গুৰুত্বপূৰ্ণ পদক্ষেপ গ্ৰহণ কৰিছে।
জাননীখনত মেচাৰ্ছ দিনেশ চন্দ্ৰ কামাখ্যা হাইৱে কনচেছন প্ৰাইভেট লিমিটেড নামৰ সংস্থাটোক বাৰে বাৰে কোৱাৰ পিছতো ঘাইপথৰ পানী যোৱা নলা বা কালভাৰ্টসমূহ পৰিষ্কাৰ নকৰাৰ বাবে জগৰীয়া কৰা হৈছে।
প্ৰশাসনৰ মতে এক্সেল কেয়াৰ হাস্পতালৰ ওচৰৰ লগতে টেটেলীয়া আৰু গোটানগৰৰ দৰে ঠাইত জমা হোৱা পানীয়ে সাধাৰণ পথচাৰী আৰু স্থানীয় ৰাইজৰ বাবে যথেষ্ট সমস্যাৰ সৃষ্টি কৰিছে। বিভাগীয় তদন্তৰ সময়ত দেখা গৈছে যে নলাবোৰ পলস আৰু জাৱৰ-জোঁথৰেৰে বন্ধ হৈ থকাৰ বাবেই পানী ওলাই যাব পৰা নাই। বাৰিষাৰ আগতেই এই নলাবোৰ চাফা কৰিবলৈ মিছন ফ্লাড ফ্ৰী বৈঠকৰ জৰিয়তে নিৰ্দেশ দিয়া হৈছিল যদিও সংস্থাটোৱে ইয়াৰ প্ৰতি কোনো গুৰুত্ব নিদিয়াৰ অভিযোগ উত্থাপন হৈছে।
এই গাফিলতিৰ বাবে দুৰ্যোগ ব্যৱস্থাপনা আইন ২০০৫-ৰ অধীনত কিয় আইনী ব্যৱস্থা গ্ৰহণ কৰা নহ’ব, সেই সন্দৰ্ভত সংস্থাটোক তিনি দিনৰ ভিতৰত উত্তৰ দিবলৈ কোৱা হৈছে। প্ৰশাসনে স্পষ্ট কৰি দিছে যে যদিহে সংস্থাটোৰ উত্তৰ সন্তোষজনক নহয়, তেন্তে তেওঁলোকৰ বিৰুদ্ধে অধিক কঠোৰ আইনগত ব্যৱস্থা গ্ৰহণ কৰা হ’ব। বাৰিষাৰ পূৰ্বে কৃত্ৰিম বান নিয়ন্ত্ৰণৰ ক্ষেত্ৰত কোনো ধৰণৰ আপোচ কৰা নহ’ব বুলিও কৰ্তৃপক্ষই জানিবলৈ দিছে।