হিংসাত নিহতৰ আত্মীয়লৈ ২০ লাখকৈ, এজনক চাকৰি; পিআৰচিৰ বিষয় চিৰদিনলৈ বন্ধ কৰাৰ প্ৰতিশ্ৰুতি পেমা খাণ্ডুৰ
খিলঞ্জীয়াৰ প্ৰশ্নত উগ্ৰমূৰ্তি ধৰা অৰুণাচল প্ৰদেশৰ ৰাইজৰ ক্ৰোধ শাম কটাবলৈ মুখ্য মন্ত্ৰী পেমা খাণ্ডুৱে আজি অৰুণাচলীসকলৰ সমৰ্থন আদায় কৰিব পৰা কেইবাটাও প্ৰতিবিধানমূলক পদক্ষেপ ঘোষণা কৰিছে।
প্ৰস্তাৱিত ৬টা জনগোষ্ঠীক কেতিয়াও স্থায়ী বাসিন্দাৰ প্ৰমাণপত্ৰ দিয়া নহ’ব বুলি স্পষ্ট ঘোষণা কৰাৰ লগতে খাণ্ডুৱে হিংসাত নিহতসকলৰ আত্মীয়লৈ ২০ লাখকৈ এককালীন সাহায্য, পৰিয়ালৰ যিকোনো এজনক চাকৰি দিয়াৰ প্ৰতিশ্ৰুতি দিয়ে।
এই উত্তেজনাকেন্দ্ৰিক হিংসাত ৩জনকৈ লোকৰ মৃত্যু হৈছিল।
ইয়াৰোপৰি গুৰুতৰভাৱে আহতসকলক ১০ লাখ পৰ্য্যন্ত টকা দিয়া হ’ব বুলিও ঘোষণা কৰে মুখ্য মন্ত্ৰীজনে।
কালিৰ নিয়ন্ত্ৰণহীন হিংসাৰ পৰিস্থিতিৰ পিছত ৰাজ্যবাসীৰ ওচৰত এক প্ৰকাৰৰ আত্মসমৰ্পণ কৰা মুখ্য মন্ত্ৰীজনে ৰাজ্যখনৰ বিভিন্ন সম্প্ৰদায়-গোষ্ঠীৰ দল-সংগঠনৰ প্ৰতিনিধিৰ সৈতে এখন বৈঠকৰ আহ্বান কৰে। এই বৈঠকত নিছি এলিট ছ’চাইটি, আদি বানে কেবাং আদিয়ে ভাগ লয়।
চৰকাৰে এই প্ৰতিবিধানমূলক পদক্ষেপকেইটাৰ কথা ঘোষণা কৰাৰ লগতে ঘটনাৱলীৰ তদন্তৰ বাবে কমিটী গঠনৰ সিদ্ধান্তও লয়। ইয়াৰোপৰি পাপুম পাৰে জিলাৰ উপায়ুক্ত আৰু আৰক্ষী অধীক্ষকক তৎকালীনভাৱে নিলম্বনৰ সিদ্ধান্ত লয়।
এখন সৰ্বদলীয় বৈঠকৰো আহ্বান জনোৱা হৈছিল যদিও কেৱল বিজেপিৰ সদস্যসকলহে উপস্থিত থাকে বুলি জানিব পৰা গৈছে।
মুখ্য মন্ত্ৰী খাণ্ডুৱে সকলোকে শান্তি-সম্প্ৰীতি বজাই ৰাখিবলৈ বাৰে বাৰে আহ্বান জনাইছে।