খেৰী হত্যাকাণ্ডৰ মূল অভিযুক্ত আশীষ মিশ্ৰক তিনি দিনৰ আৰক্ষী জিম্মালৈ প্ৰেৰণ
লখিমপুৰ খেৰীৰ কৃষক হত্যাকাণ্ডৰ মূল অভিযুক্ত আশীষ মিশ্ৰক আজি তিনি দিনৰ বাবে আৰক্ষীৰ জিম্মালৈ প্ৰেৰণ কৰা হয়।
উল্লেখ্য যে লখিমপুৰ খেৰীত হিংসাত্মক ঘটনা সন্দৰ্ভত প্ৰায় ১২ ঘণ্টা জেৰাৰ পিছত যোৱা শনিবাৰে কেন্দ্ৰীয় মন্ত্ৰী অজয় মিশ্ৰাৰ পুত্ৰ আশীষ মিশ্ৰক গ্ৰেপ্তাৰ কৰা হৈছিল।
উত্তৰ প্ৰদেশৰ লখিমপুৰ খেৰীত কৃষি আইন বিৰোধী প্ৰতিবাদস্থলীত চাৰিজন কৃষকক গাড়ীৰে মহতীয়াই হত্যা কৰাৰ অভিযোগেৰে আশীষ মিশ্ৰৰ নাম এজাহাৰত উল্লেখ কৰা হৈছিল।
ইফালে, লখিমপুৰ খেৰী হিংসাৰ বিৰুদ্ধে প্ৰতিবাদ কৰিবলৈ মহা বিকাশ আঘাদীয়ে আহ্বান জনোৱা মহাৰাষ্ট্ৰ বন্ধৰ পৰিপ্ৰেক্ষিতত কিছু ঠাইত বিক্ষিপ্ত ঘটনাৰ পিছত সমগ্ৰ মুম্বাইত বাছ সেৱা বন্ধ কৰি দিয়া হয়।
আনহাতে লখিমপুৰ খেৰী হিংসাৰ প্ৰতিবাদ কৰি আৰু কেন্দ্ৰীয় মন্ত্ৰী অজয় মিশ্ৰৰ পদত্যাগ দাবী কৰি কংগ্ৰেছ নেতা আৰু কৰ্মীসকলে সোমবাৰে দেশৰ বিভিন্ন প্ৰান্তত লেফটেনেণ্ট গভৰ্ণৰৰ কাৰ্যালয়ৰ ওচৰত ‘মৌন ব্ৰত’ কাৰ্যসূচী ৰূপায়ণ কৰে।
“কংগ্ৰেছে ৰাজ্য আৰু কেন্দ্ৰীয় সংস্থাসমূহৰ ৰাজ্যপাল আৰু লেফটেনেণ্ট গভৰ্ণৰসকলৰ কাৰ্যালয়ৰ বাহিৰত ‘মৌন ব্ৰত সত্যাগ্ৰহ’ ৰূপায়ণ কৰিব। আমি কেন্দ্ৰীয় গৃহ ৰাজ্যমন্ত্ৰী অজয় মিশ্ৰক পদত্যাগ আৰু গ্ৰেপ্তাৰ কৰাৰ দাবী জনাইছো, অজয় মিশ্ৰই লখিমপুৰ ঘটনাৰ তদন্তত প্ৰভাৱ পেলাব পাৰে।” প্ৰতিবাদৰ আগমুহূৰ্তত দিল্লী কংগ্ৰেছৰ সভাপতি অনিল কুমাৰে সংবাদ মাধ্যমৰ আগত এইদৰে মন্তব্য আগবঢ়ায়।
কংগ্ৰেছ নেতা ৰাহুল গান্ধীয়ে সোমবাৰে কয় যে কেন্দ্ৰীয় মন্ত্ৰী অজয় মিশ্ৰক বৰ্খাস্ত নকৰি বিজেপিয়ে লখিমপুৰ খেৰী হিংসা গোচৰৰ ন্যায় প্ৰক্ৰিয়াত বাধা প্ৰদান কৰিছে। তেওঁ এক টুইটযোগে কয়, “কেন্দ্ৰীয় চৰকাৰে নিহত কৃষক বা হিংসাত নিহত হোৱা সাধাৰণ বিজেপি কৰ্মীসকলৰ বিষয়ে চিন্তা নকৰে।”