এছিয়াডত অব্যাহত সাফল্যৰ ধাৰা: স্বৰ্ণ জিনিলে অন্নু ৰাণী আৰু পাৰুল চৌধুৰীয়ে

হাংঝ’ত অব্যাহত আছে ভাৰতৰ মহিলা খেলুৱৈৰ সাফল্যৰ ধাৰা। সাফল্যৰ গৌৰৱেৰে দেশক গৌৰৱান্বিত কৰি আজি এছিয়ান গেমছত স্বৰ্ণ জয় কৰিছে দুগৰাকী মহিলা খেলুৱৈয়ে।

মহিলাৰ ৫০০০ মিটাৰ দৌৰত পাৰুল চৌধুৰী আৰু জেভলিন থ্ৰ’ত অন্নু ৰাণীয়ে স্বৰ্ণ অৰ্জনেৰে হাংঝ’ত ভাৰতৰ স্বৰ্ণ পদকৰ সংখ্যা ১৫ টালৈ বৃদ্ধি কৰিছে। ২০১৪ চনত ইঞ্চিয়ন এছিয়াডত ব্ৰঞ্জ জয়ী অন্নুৱে আজি ৬২.৯২ মিটাৰ থ্ৰ’ৰে স্বৰ্ণ লাভ কৰে।

ইফালে চমকপ্ৰদ সামৰণিৰে পাৰুল চৌধুৰীয়ে ৫০০০ মিটাৰ দৌৰত লাভ কৰে স্বৰ্ণ। অন্তিম ৫০ মিটাৰত অবিশ্বাস্য প্ৰদৰ্শনেৰে জাপানৰ ৰিৰিকা হিৰোনাকাক অতিক্ৰমি স্বৰ্ণ নিশ্চিত কৰে পাৰুলে।

লক্ষণীয়ভাৱে চলিত এছিয়াডত পাৰুলৰ এয়া দ্বিতীয়টো পদক। ইয়াৰ পূৰ্বে ৩০০০ মিটাৰ ষ্টীপলচেজত ৰূপৰ পদক লাভ কৰিছিল দৌৰবিদ গৰাকীয়ে।

এই দুই তাৰকাৰ স্বৰ্ণ জয়ৰ বিপৰীতে তেজস্বীন শংকৰে ডেকাথলনত আৰু মহম্মদ আফছালে পুৰুষৰ ৮০০ মিটাৰ দৌৰত ৰূপৰ পদক লাভ কৰে। সেইদৰে পুৰুষৰ ত্ৰিপ’ল জাম্পত প্ৰবীন চিথাৰাভেল আৰু মহিলাৰ ৪০০ মিটাৰ হাৰ্ডলছত বিথ্যা ৰামৰাজে ব্ৰঞ্জৰ পদক লাভ কৰিছে।

কাজাখস্তানৰ কামছীবেক কংকাবায়েবৰ বিৰুদ্ধে ছেমি ফাইনেলত পৰাস্ত হোৱাৰ ফলশ্ৰুতিত +৯২ কিলোগ্ৰাম শাখাত ব্ৰঞ্জৰ পদকত সন্তুষ্ট থাকিবলগীয়া হৈছে বক্সাৰ নৰেন্দৰে।

ইয়াৰ পূৰ্বে ভাৰতে স্কোৱাছত সৌৰভ ঘোছাল (পুৰুষৰ একক), দিপিকা পালিকাল/হাৰিন্দৰ পাল সিং (মিক্সড ডাবলছ), অভয় সিং/আনাহাট সিঙে(মিক্সড ডাবলছ)ত তিনিটা পদক নিশ্চিত কৰিছে।