বিলকিছ বানো ধৰ্ষণকাৰীৰ মুক্তি প্ৰসঙ্গ: শুকুৰবাৰে শুনানি গ্ৰহণ কৰিব উচ্চতম ন্যায়ালয়ে

দেশৰ ইতিহাসৰ এক কলংকিত অধ্যায় গুজৰাটৰ নৃশংস গোধৰা কাণ্ডৰ সময়ত সংঘটিত হোৱা বিলকিছ বানো দলবদ্ধ ধৰ্ষণ কাণ্ডৰ দোষীৰ মুক্তিক প্ৰত্যাহ্বান জনাই উচ্চতম ন্যায়ালয়ত দাখিল কৰা আবেদনৰ শুনানি শুকুৰবাৰে গ্ৰহণ কৰিবলৈ সাজু হৈছে শীৰ্ষ আদালত।

ন্যায়াধীশ অজয় ৰাস্তোগী আৰু ন্যায়াধীশ বিভি নাগাৰাথনাৰ বিচাৰপীঠে ৯ ছেপ্টেম্বৰত গোচৰটোৰ শুনানি গ্ৰহণ কৰিব বুলি ইতিমধ্যে সদৰী কৰা হৈছে।

উল্লেখ্য যে বিলকিছ বানো ধৰ্ষণ গোচৰত ২০০৮ চনত দোষী সাব্যস্ত হোৱা ১১ গৰাকী অভিযুক্তক আজীৱন কাৰাদণ্ডৰে দণ্ডিত কৰা হৈছিল যদিও যোৱা মাহত গুজৰাটৰ ৰেহাই নীতিৰ অধীনত আটাইকেইগৰাকী ধৰ্ষণকাৰীকে মুক্তি দিয়া হৈছিল।

গুজৰাট চৰকাৰৰ সিদ্ধান্তৰ বিৰুদ্ধে চিপিআই(এম)ৰ পলিটব্যুৰো সদস্য সুভাষিনী আলী, তৃণমূল কংগ্ৰেছৰ সাংসদ মহুয়া মৈত্ৰা আৰু মহিলা অধিকাৰ কৰ্মীসকলে উচ্চতম ন্যায়ালয়ত লেখ আবেধদন দাখিল কৰিছিল।

উচ্চতম ন্যায়ালয়ৰ প্ৰাক্তন মুখ্য ন্যায়াধীশ ৰমনাৰ নেতৃত্বত তিনিজনীয়া বিচাৰপীঠে ২৫ আগষ্টত এই আবেদনৰ শুনানি গ্ৰহণ কৰি দোষীৰ মুক্তি সন্দৰ্ভত গুজৰাট চৰকাৰলৈ জাননী জাৰি কৰিছিল।

উল্লেখ্য যে ২০০২ চনৰ গুজৰাটৰ নৃশংস গোধৰা সাম্প্ৰদায়িক সংঘৰ্ষৰ সময়ত সেই সময়ৰ ২১ বৰ্ষীয় বিলকিছ বানোক দলবদ্ধ ধৰ্ষণ কৰা হৈছিল। সেই সময়ত বানো আছিল ৫ মহীয়া গৰ্ভৱতী।

যোৱা ১৫ আগষ্টত গুজৰাট চৰকাৰে বানোৰ ধৰ্ষণ কাণ্ডত দোষী সাব্যস্ত হোৱা ১১ গৰাকী দোষীক কাৰাগাৰৰ পৰা মুকলি কৰি দিছিল।

গুজৰাট চৰকাৰৰ এই সিদ্ধান্তই সমগ্ৰ দেশজুৰি তীব্ৰ চাঞ্চল্যৰ সৃষ্টি কৰিছিল। তাৰ পিছতেই শীৰ্ষ আদালতৰ দ্বাৰস্থ হৈছিল কেইবাগৰাকীও মহিলা কৰ্মী।