অভিৰুচি ক্ৰীড়া দিৱসত চৰকাৰী আঁচনিৰ পৰা উপেক্ষিত এছিয়ান গেমছত সোণৰ পদক বিজয়ী ফুটবলাৰ

অভিৰুচি ক্ৰীড়া দিৱসত ক্ৰীড়াবিদ সকলৰ বাবে অসম চৰকাৰে ঘোষণা কৰা আঁচনিত স্থান নাপালে ২০১৪ চনত এছিয়ান গেমচত সোণৰ পদক পোৱা ২৪ বছৰীয়া মহিলা ফুটবলাৰ অঞ্জনা শইকীয়াই।

আন্তঃৰাষ্ট্ৰীয় পৰ্যায়ত ভাৰতীয় দলৰ হৈ চাৰিবাৰকৈ খেলা খেলুৱৈগৰাকীয়ে ২০১৪ চনত চাফ এছিয়ান গেমচত পাকিস্তানৰ বিৰুদ্ধে চমকপ্ৰদ খেল প্ৰদৰ্শন কৰি সোণৰ পদক অৰ্জনেৰে উৰুৱাইছিল দেশৰ বিজয় ধ্বজা।

ভাৰতীয় মহিলা দলৰ গ’লকীপাৰ অঞ্জনাই ৯ বাৰকৈ অসম মহিলা দলকো প্ৰতিনিধিত্ব কৰি বিভিন্ন স্থানত পদক আজুৰিবলৈ সক্ষম হৈছিল।

কিন্তু এইগৰাকী প্ৰতিভিবান খেলুৱৈ আৰ্থিক দীনতাত পৰি দিশহাৰা হৈ পৰিছে।

দৰিদ্ৰ পিতৃ-মাতৃৰ মুখত ফুটবল খেলি হাঁহি বিৰিঙোৱাৰ লক্ষ্য লৈ ২০১১ চনত ঘৰৰ পৰা ওলাই আহিছিল অঞ্জনা শইকীয়া।

যোৰহাটৰ টীয়কৰ কাকজানৰ ৰবিন বৰা নামৰ এগৰাকী ব্যক্তিৰ ঘৰত থাকিয়েই অঞ্জনাই স্নাতক ডিগ্ৰী লোৱাৰ লগতে দুগুণ উৎসাহেৰে চলাই গৈছিল নিজৰ অনুশীলন।

২০২০ চনৰ নৱেম্বৰ মাহৰ ২০ তাৰিখে তেতিয়াৰ মুখ্যমন্ত্ৰীৰ সচিবে এক প্ৰত্ৰ যোগে  বিভাগীয়ভাবে চৰকাৰী চাকৰিৰ বাবে লিখিছিল যদিও আজিও চৰকাৰৰ পৰা একো নাপালে অঞ্জনাই।