মণিপুৰ মোদী চৰকাৰৰ সুশাসনৰ এটা জ্বলন্ত উদাহৰণ নেকি?-প্ৰশ্ন অসম নাগৰিক সমাজৰ

দীৰ্ঘদিন ধৰি হিংসাজৰ্জৰ মণিপুৰত এইবাৰ নিৰ্বাচনী হিংসাক লৈ প্ৰতিক্ৰিয়া প্ৰকাশ কৰিছে অসম নাগৰিক সমাজ আৰু ভাৰত জোড়ো অভিযান, অসমে। অসম নাগৰিক সমাজৰ সভাপতি অজিত কুমাৰ ভূঞা আৰু ভাৰত জোড়ো অভিযান, অসমৰ আহ্বায়ক পৰেশ মালাকাৰে এক বিবৃতি যোগে বিষয়টো সন্দৰ্ভত প্ৰতিক্ৰিয়া প্ৰকাশ কৰিছে।

বিবৃতিটোত কোৱা হৈছে, “দেশৰ লোকসভা নিৰ্বাচনৰ প্ৰথম পৰ্যায়ৰ ভোটগ্ৰহণ কালি সম্পন্ন হয়। মণিপুৰত  সংঘটিত হোৱা কেইটামান লোমহৰ্ষক ঘটনাৰ বাহিৰে বাকী ঠাইবোৰত ভোটগ্ৰহণ সুকলমে আৰু শান্তিপূৰ্ণভাৱেই অনুষ্ঠিত হৈছে। জানিবপৰা মতে পূৱ ইম্ফলৰ খংমান ভোটগ্ৰহণ কেন্দ্ৰত কিছুসংখ্যক লোকে  ১৫০জন লোকৰ নামত বলপূৰ্বক ভোটদান কৰে। পাছত প্ৰকৃত ভোটাৰসকলে ভোট দিবলৈ আহি এই কথা গম পালত  তেওঁলোকে উত্তেজিত হৈ পৰে আৰু ইভিএম  ভাঙি পেলায়। এনেধৰণৰ আৰু ঘটনা মণিপুৰৰ আন ঠাইতো ঘটা বুলি জানিব পৰা গৈছে।‘’

তেওঁলোকে কয়, “আমি এই ঘটনাৰ তীব্ৰ নিন্দা কৰোঁ আৰু নিৰ্বাচন আয়োগক এই সকলো ঠাইতে উপযুক্ত নিৰাপত্তা প্ৰদানেৰে পুনৰ ভোটগ্ৰহণ অনুষ্ঠিত কৰিবলৈ দাবী জনাওঁ। এইখিনিতে এটা কথা আমি উনুকিয়াব বিচাৰোঁ। যোৱা প্ৰায় এবছৰ ধৰি মণিপুৰ অশান্ত হৈ আছে । কিন্তু কেন্দ্ৰ আৰু ৰাজ্যৰ থকা  দুটা ইঞ্জিনৰ চৰকাৰ এই বিষয়ে সমূলি নিৰ্বিকাৰ।‘’

তেওঁলোকৰ প্ৰশ্ন,“মণিপুৰ বুলি যে এখন ৰাজ্য আছে মোদী চৰকাৰে পাহৰিলে নেকি? নে মণিপুৰক সম্পূৰ্ণ বাদেই দিয়া হৈছে! আমি কেনেকৈ সেইটো কৰিব পাৰোঁ? দেশৰ এক অন্যতম অংগৰাজ্য মণিপুৰত এইদৰে গৃহযুদ্ধ সদৃশ পৰিবেশ চলি থকাৰ কথাটো কেনেদৰে আমি আওকাণ কৰি থাকিব পাৰোঁ! মণিপুৰ সমগ্ৰ দেশৰ বাবে এটা নিৰ্বাচনী বিষয় হ’ব নোৱাৰেনে? এয়া সঁচাকৈয়ে কেন্দ্ৰৰ মোদী চৰকাৰৰ সুশাসনৰ এটা জ্বলন্ত উদাহৰণ নেকি?’’