লোকসভা নিৰ্বাচনৰ পূৰ্বে আপৰ ৰাজ্যিক উপ-সভাপতি জিতুল ডেকা, মুখপাত্ৰ সুশান্ত নাথৰ পদত্যাগ
আম আদমী পাৰ্টিৰ ৰাজ্যিক সমিতি এক বৃহৎ বিপৰ্যয়ৰ সন্মুখীন হৈছে। আপৰ ৰাজ্যিক উপ-সভাপতি আৰু এগৰাকী মুখপাত্ৰই লোকসভা নিৰ্বাচনৰ পূৰ্বে দলৰ পৰা পদত্যাগ কৰিছে।
আপ অসমৰ ৰাজ্যিক উপ-সভাপতি পদত অধিষ্ঠিত জিতুল ডেকাই দলৰ ৰাজ্যিক সভাপতিলৈ লিখা এখন পত্ৰত নিজৰ সিদ্ধান্তৰ আঁৰৰ কাৰণ উল্লেখ নকৰাকৈয়ে দলৰ প্ৰাথমিক সদস্যপদৰ পৰা পদত্যাগ কৰাৰ কথা ঘোষণা কৰিছে। আনহাতে, দলৰ এগৰাকী মুখপাত্ৰ সুশান্ত নাথেও পদত্যাগ কৰাৰ কথা জানিব পৰা গৈছে।
দুয়োগৰাকীয়ে নেতাই বিজেপিত যোগদান কৰাৰ সম্ভাৱনা আছে। বিজেপিৰ ৰাজ্যিক সভাপতি ভৱেশ কলিতাই আৰু এক যোগদান কাৰ্যসূচীৰ কথা ঘোষণা কৰিছিল আৰু তাত বিভিন্ন দলৰ কেইবাগৰাকীও নেতা-কৰ্মীয়ে যোগদান কৰাৰ কথা। সেই কাৰ্যসূচীতে আপৰ নেতা দুগৰাকীয়েও যোগদান কৰাৰ সম্ভৱনা আছে।
ইয়াৰ পূৰ্বে শুকুৰবাৰে আম আদমী পাৰ্টিয়ে অসমৰ গুৱাহাটী লোকসভাৰ আসনৰ পৰা তেওঁলোকৰ প্ৰাৰ্থী প্ৰত্যাহাৰ কৰিছিল। অৱশ্যে নিৰ্বাচনত ডিব্ৰুগড় আৰু শোণিতপুৰ সমষ্টিৰ পৰা দলটোৱে প্ৰতিদ্বন্দ্বিতা কৰিব বুলি জনাইছে।
ইপিনে, বিৰোধীয়ে ইতিমধ্যে ডিব্ৰুগড়ৰ পৰা অজাপ নেতা লুৰিণজ্যোতি গগৈক উমৈহতীয়া প্ৰাৰ্থী হিচাপে ঘোষণা কৰি শাসকীয় দলৰ বিৰুদ্ধে এক ঐক্যবদ্ধ মৰ্চাৰ ইংগিত দিছে।