তেজেৰে আঁকিলে মোদীক : শপত গ্ৰহণৰ পূৰ্বে প্ৰধান মন্ত্ৰীলৈ অসমৰ চিত্ৰকৰৰ উপহাৰ

মোদী কেবিনেটৰ শপত গ্ৰহণৰ দিনটোতে হাতৰ আঙুলিৰ তেজেৰে ভাৰতৰ প্ৰধান মন্ত্ৰীৰ চিত্ৰ অংকন কৰিলে গৌতম বৰ্ধন নামৰ লামডিংৰ এজন লোকে।

গুৱাহাটী প্ৰেছ ক্লাবত আজি ১০ মিনিটত বৰ্ধনে তেজেৰে অংকন কৰি উলিয়ালে মোদীৰ চিত্ৰ। উল্লেখযোগ্য যে ইয়াৰ পূৰ্বেও ২০১৪ চনত প্ৰথমবাৰ প্ৰধান মন্ত্ৰী হোৱাৰ সময়ত মোদীক, সুধাকণ্ঠ ভূপেন হাজৰিকা, মামনি ৰয়ছম গোস্বামী আৰু প্ৰাক্তন ৰাষ্ট্ৰপতি এ পি জে আব্দুল কালামক অংকন কৰিছিল বুলি তেওঁ জনায়।

আনহাতে ২০০৪ চনত প্ৰাক্তন ৰাষ্ট্ৰপতি কালামক তেওঁ তেজেৰে অঁকা চিত্ৰ নিজ হাতেৰে অৰ্পণ কৰিছিল বুলি জানিবলৈ এইবাৰো প্ৰধান মন্ত্ৰীৰ আমন্ত্ৰণ পালে নিজে গৈ মোদীকো এই ছবি উপহাৰ দিয়াৰ ইচ্ছা প্ৰকাশ কৰে।

চিত্ৰ অংকন কৰি গৌতম বৰ্ধনৰ নৰেন্দ্ৰ মোদীলৈ আহ্বান : অসমক সকলো দিশৰ পৰা ভাৰতৰ ভিতৰতে প্ৰথম স্থানত ৰাখিব লাগিব।

উল্লেখযোগ্য যে ১৯৯৪ চনৰ পৰা এতিয়ালৈকে তেজেৰে ১২৪খন চিত্ৰ অংকন কৰা বৰ্ধনৰ লামডিংত প্রিয়সভা নামৰ এখন চিত্ৰাংকণ বিদ্যালয় আছে। আনহাতে আজি তেজেৰে ছবি আঁকি উঠি তেওঁ ছাত্ৰ-ছাত্ৰী বা ল’ৰা-ছোৱালীক ইয়াৰ অনুকৰণ নকৰিবলৈ কয়।