অৰ্ধ শতাধিক সংগঠনৰ দাবী মিছা, অসম বন্ধৰ প্ৰকৃত সত্য ব্যাখ্যা বিজেপি নেতাৰ
অৰ্ধ শতাধিক সংগঠনে শেহতীয়াকৈ আহ্বান কৰা অসম বন্ধ সৰ্বাত্মক নাছিল। সংগঠনসমূহৰ দাবী “মিছা” বুলি বেকত কৰি প্ৰকৃত সত্যটো বুধবাৰে গুৱাহাটীত বেকত কৰিছে বিজেপি নেতা তথা নগৰ পানী যোগান আঁচনি ও নৰ্দমা পৰিষদৰ নৱ নিযুক্ত অধ্যক্ষ ডা০ নুমল মমিনে।
“বন্ধ স্বতঃস্ফূৰ্তভাৱে হ’ল বুলি ঘোষণা কৰাটো মিছা কথা। এই বন্ধতকৈ অসম আন্দোলনৰ বন্ধ বেছি বিয়াগোম তথা সৰ্বাত্মক আছিল,‘’ এই মন্তব্য বোকাজানৰ বিধায়ক মমিনৰ।
কেৱল চৰ অঞ্চলৰ লোকসকলেহে বন্ধ পালন কৰিছিল বুলি মন্তব্য কৰা বিজেপিৰ ৰাজ্যিক সভাপতি ৰঞ্জিত দাসৰ সুৰতে সুৰ মিলাই মমিনে কয়, ‘‘কালি গুৱাহাটীত দোকান-পোহাৰ বন্ধ আছিল যদিও যান-বাহন চলি আছিল, আনকি চিটি বাছো চলি আছিল।’‘
ব্যৱসায়ীসকলে কিয় দোকান বন্ধ ৰাখিছিল তাৰো ব্যাখ্যা আগবঢ়াই মমিনে কয়, ‘‘কোনো কোনোৱে হয়তো সমৰ্থনত বন্ধ ৰাখিলে আৰু অন্য কিছুমানে ঘৰতে আৰাম কৰো বুলি ভাবি বন্ধ ৰাখিলে।”
নিজকে “কাৰ্বি আংলঙ”ৰ পৰা অহা বুলি উল্লেখ কৰি মমিনে কয়, “এয়া কি বন্ধ! কাৰ্বি আংলঙতো ১০০০ ঘন্টীয়া বা ১৫০০ ঘন্টীয়া বন্ধ অতিবাহিত কৰি আহিছো।‘’
তেওঁৰ মতে, ‘‘বন্ধই কোনো সমস্যা সমাধান নকৰে, বন্ধই দেশখনক বহু পিছলৈ লৈ যাব। বহু দুখীয়া লোকসকলৰ পেটৰ ভাত মাৰিবৰ কাৰণেহে এই বন্ধ।’‘
নাগৰিকত্ব বিধেয়কৰ বিৰোধিতা আৰু যুটীয়া সংসদীয় কমিটি অসমলৈ প্ৰতিশ্ৰুতি দি নহাৰ প্ৰতিবাদত কৃষক মুক্তি সংগ্ৰাম সমিতি, অসম জাতীয়তাবাদী যুৱ ছাত্ৰ পৰিষদকে ধৰি ৰাজ্যখনৰ অৰ্ধ শতাধিক সংগঠনে দিয়া বন্ধক সমালোচনা কৰি ওলোটাই মুখ্য মন্ত্ৰী সোণোৱালক ধন্যবাদ জনাবহে লাগে বুলি দাবী কৰে মমিনে।
‘‘সৰ্বানন্দ সোণোৱালে দাবী কৰাৰ বাবে অসমলৈ যুটীয়া সংসদীয় কমিটি আহিছিল। অসমীয়া ৰাইজে সৰ্বানন্দ সোণোৱালক ধন্যবাদহে জনাব লাগে,” মন্তব্য মমিনৰ।
খিলঞ্জীয়া বিধায়কজনৰ মতে ‘‘অসমীয়াৰ স্বাৰ্থত সৰ্বানন্দ সোণোৱাল আৰু প্ৰধান মন্ত্ৰী নৰেন্দ্ৰ মোদী থিয় দিব তাত কোনো সন্দেহ নাই।”