যমুনা বড়ো আৰু সঞ্জয় বড়োক আবকাৰী পৰিদৰ্শকৰ চাকৰি; আৰু কি গুৰুত্বপূৰ্ণ সিদ্ধান্ত কেবিনেটৰ?
অসমলৈ গৌৰৱ কঢ়িয়াই অনা বক্সাৰ যমুনা বড়ো আৰু আৰ্চাৰ সঞ্জয় বড়োক আবকাৰী পৰিদৰ্শক হিচাপে নিযুক্তি দিয়া হ’ব।
বুধবাৰে কইনাধৰাত অনুষ্ঠিত ৰাজ্য চৰকাৰৰ কেবিনেট বৈঠকত এই সিদ্ধান্ত গ্ৰহণ কৰা হয়।
অভিৰুচি ক্রীড়া দিৱসৰ দিনাই দুয়োজনকে প্রদান কৰা হ’ব নিযুক্তি পত্র।
ইপিনে, ৰাজীৱ গান্ধী অভয়াৰণ্যৰ নাম পুনৰ ওৰাং অভয়াৰণ্য কৰাৰ সিদ্ধান্ত গ্ৰহণ কৰিছে কেবিনেটে। ওৰাং ৰাষ্ট্ৰীয় উদ্যানৰ পৰা ৰাজীৱ গান্ধীৰ নাম প্ৰত্যাহাৰ কৰা হৈছে আৰু এতিয়াৰে পৰা ৰাজীৱ গান্ধী ৰাষ্ট্ৰীয় উদ্যানক কেৱল ওৰাং ৰাষ্ট্ৰীয় উদ্যানৰূপেহে জনা যাব।
আদিবাসী আৰু চাহ জনগোষ্ঠীৰ আহ্বান মৰ্মে ওৰাং অভয়াৰণ্যৰ নাম ওৰাং ৰাষ্ট্ৰীয় উদ্যান কৰা বুলি কোৱা হৈছে।
আনহাতে, কেবিনেটে ডাঃ সম্বোদৰ ধৰক শিলচৰ মেডিকেল কলেজৰ নিউৰ’ চার্জন হিচাপে নিযুক্তি দিছে।
সেইদৰে কেবিনেটে ক’ভিডৰ বাবে ৬৬০ কোটি টকাৰ অনুমোদন দিছে।
ক’ভিডত মৃত্যু মুখত পৰা ব্যক্তিৰ ক্ষেত্ৰত তিনিখন আঁচনি গ্ৰহণ কৰা হৈছে।
সেই অনুসৰি, ক’ভিডত যদি কোনো শিশুৰ পিতৃ-মাতৃ ঢুকায়, তেন্তে তেওঁৰ নামত ৭.৫ লাখ টকাৰ ফিক্স ডিপজিট কৰা হ’ব। তদুপৰি, ক’ভিডত স্বামী হাৰা পত্নীলৈ ১ লাখ টকা আগবঢ়োৱা হ’ব।
ক’ভিডত মৃত্যু হোৱা লোকৰ বাবে নতুন আঁচনি ‘প্ৰাৰ্থনা’ৰ অধীনলৈ আহিব প্ৰায় ৬০০০ লোক । ক’ভিডত মৃত্যু হোৱা দুখীয়া লোকৰ নিকততম আত্মীয়ই পাব ১ লাখ টকাৰ এক কালীন সাহায্য।