বাঘজান ট্ৰাজিডিৰ তদন্তৰ নিৰ্দেশ মুখ্য মন্ত্ৰী সোণোৱালৰ

অসমৰ মুখ্য মন্ত্ৰী সৰ্বানন্দ সোণোৱালে তিনিচুকীয়াৰ বাঘজানত অইল ইণ্ডিয়া লিমিটেডৰ গেছখাদত সংঘটিত অগ্নিকাণ্ডৰ ঘটনাৰ এক উচ্চস্তৰীয় তদন্তৰ বাবে বৃহস্পতিবাৰে নিৰ্দেশ দিছে।

মুখ্য মন্ত্ৰীগৰাকীয়ে অতিৰিক্ত মুখ্য সচিব মনিন্দৰ সিঙক এক তদন্ত কৰি ১৫দিনৰ ভিতৰত প্ৰতিবেদন দাখিল কৰিবলৈ নিৰ্দেশ দিছে।

তদন্তটোৱে অইলৰ কিছু বিষয়া আৰু খাদটোৰ ব্যক্তিগত অপাৰেটৰৰ বিৰুদ্ধে উঠা অৱহেলাৰ অভিযোগৰো তদন্ত কৰিব।

তদন্তটোৱে সমগ্ৰ ট্ৰাজিডিটো কেনেকৈ সংঘটিত হ’ল আৰু ভৱিষ্যতে এনে ঘটনা নঘটাৰ বাবে কি ব্যৱস্থা গ্ৰহণ কৰা উচিত সেয়া বিচাৰি উলিওৱাৰ চেষ্টা কৰিব।

বাঘজানৰ ৫নং খাদত সংঘটিত অগ্নিকাণ্ডত দুজন অগ্নিনিৰ্বাপন কৰ্মীয়ে জীৱন হেৰুওৱাৰ লগতে কাষৰীয়া অঞ্চলসমূহৰ পৰা কেইবা হাজাৰ মানুহ স্থানান্তৰিত কৰা হৈছে।

খাদটোত সংঘটিত বিস্ফোৰণটো ইমানেই প্ৰচণ্ড আছিল যে ৩০ কি.মি.তকৈয়ো অধিক দূৰত্বৰ পৰা বহু মিটাৰ উচ্চতালৈকে ডাঠ, ক’লা ধোঁৱা ওলাই থকা দেখা পোৱা গৈছে।

খাদটোত কৰ্তব্যত অৱহেলাৰ অভিযোগত অইলৰ দুজন বিষয়াক নিলম্বিত কৰা হৈছে।

লগতে খাদটোৰ ব্যক্তিগত অপাৰেটৰ জন এনাৰ্জি প্ৰাইভেট লিমিটেডলৈ কাৰণ দৰ্শোৱাৰ জাননী প্ৰেৰণ কৰা হৈছে।