অপেক্ষাৰ অৱসান; মুখ্য মন্ত্ৰীয়ে প্ৰদান কৰিলে আনন্দৰাম বৰুৱা বঁটা-২০১৮

দীঘলীয়া অপেক্ষাৰ অন্ত পেলাই অৱশেষত আজি মুখ্য মন্ত্ৰী সৰ্বানন্দ সোণোৱালে ২০১৮ চনৰ হাইস্কুল শিক্ষান্ত পৰীক্ষা, হাই মাদ্ৰাছা, সংস্কৃত প্ৰৱেশিকা আৰু পালি পৰীক্ষাত সুখ্যাতিৰে উত্তীৰ্ণ ৰাজ্যৰ মেধাৱী ছাত্ৰ-ছাত্ৰীসকলক আনন্দৰাম বৰুৱা বঁটাৰ অধীনত লেপটপ প্ৰদান কৰে।

গুৱাহাটীৰ সৰুসজাই ষ্টেডিয়ামত আজি এই বঁটা প্ৰদান কাৰ্যসূচী আৰম্ভ কৰা হয়। এইবাৰ এই বঁটাৰ অধীনত ৰাজ্যখনৰ ২০,৭২০ গৰাকী ছাত্ৰ-ছাত্ৰীয়ে লেপটপ লাভ কৰিব।

উল্লেখযোগ্য যে পূৰ্বৰ চৰকাৰৰ দিনত প্ৰথম বিভাগত উত্তীৰ্ণ সকলোকে এই বঁটা প্ৰদান কৰা হৈছিল যদিও বিজেপি চৰকাৰে ইয়াক কেৱল ৭৫ শতাংশ বা তাতকৈ অধিক নম্বৰ পোৱাসকলকহে এই বঁটা প্ৰদান কৰাৰ নিয়ম কৰে।

আনহাতে এইবাৰ চৰকাৰে বঁটা লাভ কৰা ছাত্ৰ-ছাত্ৰী সকলক লেপটপৰ উপৰি ৱাই-ফাই ডংগলৰ সৈতে দুইবছৰৰ ফ্ৰী ইণ্টাৰনেট কানেকচনো প্ৰদান কৰিব।

আজিৰ উক্ত অনুষ্ঠানত মুখ্য মন্ত্ৰীৰ উপৰি শিক্ষা মন্ত্ৰী সিদ্ধাৰ্থ ভট্টচাৰ্য্য, ৰাজ্যিক শিক্ষা মন্ত্ৰী পল্লৱ লোচন দাস, শিক্ষা বিভাগৰ সচিব প্ৰীতম শইকীয়া, ছেবাৰ অধ্যক্ষ আৰ চি জৈনকে ধৰি অন্যান্যসকল উপস্থিত থাকে।