দৰঙত বানপীড়িতলৈ সহায়ৰ হাত চৰ চাপৰি উন্নয়ন আত্মসহায়ক গোটৰ

ৰাজ্যৰ প্ৰলয়ঙ্কাৰী বানৰ বিভীষিকাৰ মাজতে আজি দৰং জিলাৰ চৰ চাপৰি অঞ্চলত সাহায্য সামগ্ৰী বিতৰণ আৰু উদ্ধাৰ অভিযান চলাই চৰ চাপৰি উন্নয়ন আত্মসহায়ক গোটে।

ছিপাঝাৰ আৰু মঙলদৈ বিধানসভা সমষ্টিৰ বহুকেইখন চাপৰিত প্ৰায় ৩ সহস্ৰাধিক বানপীড়িত লোক আৰু শিশুৰ মাজত প্ৰয়োজনীয় সামগ্ৰী প্ৰদান কৰে গোটটোৱে। ভূতভূতি আৰু সৰু বৰ নাও লৈ গোটৰ প্ৰায় ২৫ জনীয়া দলে অতি কষ্টৰে এই সাহায্য অভিযান চলোৱাৰ লগতে কেইবাজনো লোকক উদ্ধাৰ কৰে।

উক্ত অভিযানত গোটটোৰ সদস্যসকলক বিশেষভাবে সহায় কৰে মঙলদৈৰ সাংসদ দিলীপ শইকীয়া, দৰং জিলা প্ৰশাসন, দৰঙৰ অতিৰিক্ত আৰক্ষী অধীক্ষক মামণি হাজৰিকা, দৰং আৰক্ষী আৰু গুৱাহাটীৰ বৰবাৰী স্থিত মাতৃ কল্যান বৃদ্ধাশ্ৰমৰ কৰ্মকৰ্তা সকলে।

আত্মসহায়ক গোটটোৰ সদস্যসকলে নিজাববীয়া প্ৰচেষ্টা চলাই পানী, ব্ৰেড জেলি, বিস্কুট, শিশুৰ বাবে হৰলিক্স, পশুৰ খাদ্য, ধূপ আদি প্ৰদান কৰি অতি দুৰ্গম চাপৰিৰ খিলঞ্জীয়া বানাক্ৰান্তক সহায়ৰ হাত আগবঢ়ায়।

উল্লেখযোগ্য যে ২০১৬ চনৰ পৰা গোটটোৱে চৰ চাপৰি অঞ্চলত বিভিন্ন উন্নয়নমূলক কাম আৰু যুৱক-যুৱতী সকলৰ স্বনিয়োজনৰ কাম কৰি আহিছে। লগতে সাংসদ দিলীপ শইকীয়াৰ তৎপৰতাত বহুকেইটা উন্নয়নমূলক কাম হাতত লৈছে।আত্মসহায়ক গোটটোৰ এই পদক্ষেপক বানপীড়িত ৰাইজে প্ৰশংসা কৰে।