অসমত গুৰুতৰ হৈছে বান পৰিস্থিতি; ক্ষতিগ্ৰস্ত লোকৰ সংখ্যা চাৰিগুণলৈ বৃদ্ধি

অসমত বান পৰিস্থিতিয়ে পুনৰ এক উদ্বেগজনক ৰূপ লৈছে। অসম ৰাজ্যিক দুৰ্যোগ ব্যৱস্থাপনা প্ৰাধিকৰণে প্ৰকাশ কৰা তথ্য অনুসৰি, ১৫ জুলাইত ৰাজ্যখনত বানৰ ফলত মৃত্যু হোৱা লোকৰ সংখ্যা চাৰিগৰাকীলৈ বৃদ্ধি পাইছে। একে সময়তে বানত ক্ষতিগ্ৰস্ত হোৱা লোকৰ সংখ্যা প্ৰায় চাৰিগুণ বৃদ্ধি পাই বৰ্তমান ৩৭ হাজাৰৰ ঘৰ অতিক্ৰম কৰিছে।

বানপানীৰ ফলত শেহতীয়াকৈ শোণিতপুৰ জিলাৰ চাৰিদুৱাৰ ৰাজহ চক্ৰৰ অন্তৰ্গত এলেকাত আন এগৰাকী লোকৰ মৃত্যু হোৱাৰ খবৰ পোৱা গৈছে। দুৰ্যোগ ব্যৱস্থাপনা প্ৰাধিকৰণে জানিবলৈ দিয়া মতে, যোৱা ১৩ জুলাইৰ নিশাৰ পৰা সন্ধানহীন হৈ থকা উক্ত ব্যক্তিগৰাকীৰ মৃতদেহ ১৪ জুলাইত উদ্ধাৰ কৰা হয়। ৰাজ্যখনৰ বিভিন্ন প্ৰান্তত বানৰ পানীয়ে নতুন অঞ্চল প্লাৱিত কৰাৰ লগে লগে ক্ষতিগ্ৰস্ত লোকৰ এই পৰিসংখ্যা দ্ৰুতগতিত বৃদ্ধি পাবলৈ ধৰিছে।

পৰিস্থিতিৰ প্ৰতি লক্ষ্য ৰাখি চৰকাৰ তথা জিলা প্ৰশাসনে সামগ্ৰিক অৱস্থাৰ ওপৰত তীক্ষ্ণ নজৰ ৰাখিছে। ইতিমধ্যে বানপীড়িত অঞ্চলসমূহত আৱদ্ধ হৈ থকা লোকসকলৰ বাবে প্ৰয়োজনীয় সাহায্য প্ৰদানৰ লগতে প্ৰশাসনৰ তৎপৰতাত উদ্ধাৰ অভিযান অব্যাহত ৰখা হৈছে বুলি সদৰী কৰিছে।