অসম কংগ্ৰেছত বিৰাট খহনীয়া: পদত্যাগ ভূপেন বৰাৰ, ২০ ফেব্ৰুৱাৰীত বিজেপিত যোগদানৰ সম্ভাৱনা

অসমৰ ৰাজনৈতিক মহলত এতিয়া ব্যাপক চাঞ্চল্যৰ সৃষ্টি হৈছে। অসম প্ৰদেশ কংগ্ৰেছ কমিটিৰ প্ৰাক্তন সভাপতি ভূপেন বৰাই দলৰ পৰা পদত্যাগ কৰিছে। বিশেষ সূত্ৰৰ পৰা লাভ কৰা খবৰ অনুসৰি, ভূপেন বৰাই ইতিমধ্যে নিখিল ভাৰত কংগ্ৰেছ কমিটিৰ সভাপতি মল্লিকাৰ্জুন খাৰ্গেলৈ নিজৰ পদত্যাগ পত্ৰ প্ৰেৰণ কৰিছে। দীৰ্ঘদিন ধৰি বিৰোধী ঐক্যৰ মাজত চলি থকা কিছুমান বিশেষ কাৰণক লৈ তেওঁ অসন্তুষ্ট আছিল বুলি জানিব পৰা গৈছে।

উল্লেখ্য যে, অখিল গগৈৰ নেতৃত্বত থকা ৰাইজৰ দল আৰু অন্যান্য মিত্ৰ শক্তিৰ সৈতে বিৰোধী ঐক্যৰ বৈঠকসমূহ আগবঢ়াই নিয়াৰ গুৰুত্বপূৰ্ণ দায়িত্ব ভূপেন বৰাক অৰ্পণ কৰা হৈছিল। কিন্তু এই মিত্ৰজোঁটৰ মাজত কংগ্ৰেছ সাংসদ ৰকিবুল হুছেইনৰ প্ৰৱেশ আৰু শেহতীয়া কিছুমান ঘটনাই বৰাক আশংকাত পেলাইছিল। বিশেষকৈ মিত্ৰজোঁট যি দিশে আগবাঢ়িছে, তাক লৈ তেওঁ সুখী নাছিল বুলি সূত্ৰই দাবী কৰিছে।

ইফালে ভূপেন বৰাই নিজৰ ছ’চিয়েল মিডিয়া প্লেটফৰ্ম এক্সৰ বায়’ৰ পৰা কংগ্ৰেছ দলৰ নাম আঁতৰাই পেলাইছে। ইয়াৰ লগে লগে তেওঁৰ পৰৱৰ্তী পদক্ষেপক লৈ চৰ্চা আৰম্ভ হৈছে। আন এক বিশেষ খবৰ অনুসৰি, অহা ২০ ফেব্ৰুৱাৰীত কেন্দ্ৰীয় গৃহমন্ত্ৰী অমিত শ্বাহৰ অসম ভ্ৰমণৰ সময়তে তেওঁৰ উপস্থিতিত ভূপেন বৰাই বিজেপিত যোগদান কৰাৰ সম্ভাৱনা আছে। অৱশ্যে এই সন্দৰ্ভত ভূপেন বৰাৰ পৰা বৰ্তমানলৈকে কোনো আনুষ্ঠানিক মন্তব্য পোৱা হোৱা নাই।