৫০খন পতাকা উত্তোলনেৰে নগাঁৱত অসম হোমিঅ’পেথিক চিকিৎসা মহাবিদ্যালয়ৰ সোণালী জয়ন্তী সমাৰোহ আৰম্ভ

নগাঁৱৰ ঐতিহ্যমণ্ডিত অসম হোমিঅ’পেথিক চিকিৎসা মহাবিদ্যালয়ৰ সোণালী জয়ন্তী সমাৰোহ আজিৰে পৰা আৰম্ভ হৈছে।

বৰ্ষজোৰা কাৰ্যসূচীৰে আয়োজিত সোণালী জয়ন্তী সমাৰোহৰ আজি আৰম্ভণি অনুষ্ঠানৰ মূল পতাকা উত্তোলন কৰে মহাবিদ্যালয়খনৰ অধ্যক্ষ ডাঃ ডি চি দাসে।

ইয়াৰ পিছতে সোণালী জয়ন্তীৰ লগত সংগতি ৰাখি ৪৯ খন পতাকা উত্তোলন কৰে নগাঁৱৰ বহু কেইগৰাকী বিশিষ্ট ব্যক্তিৰ লগতে মহাবিদ্যালয়খনৰ প্ৰাক্তন ছাত্ৰ-ছাত্ৰী, অধ্যাপক-অধ্যাপিকা আৰু প্ৰাক্তন কৰ্মচাৰীসকলে।

আনহাতে বিশিষ্ট শিক্ষাবিদ লক্ষীনাৰায়ণ শৰ্মাই অনুষ্ঠানটোৰ বন্তি প্ৰজ্বলন কৰাৰ লগতে সোণালী জয়ন্তী বৰ্ষৰ ফলক উন্মোচন কৰে মহাবিদ্যালয়ৰ ভূমি দাতা বিশিষ্ট সমাজকৰ্মী প্ৰহ্লাদ মিট্টালে।

ইফালে মহাবিদ্যালয় মূল পথৰ ফলক উন্মোচন কৰে ভূমি দাতা সমাজকৰ্মী দেবেন্দ্ৰ সিং চেহমিয়ে। শ্বহীদ তৰ্পন কাৰ্যসূচীৰ শুভাৰম্ভ কৰে মহাবিদ্যালয় প্ৰাক্তন অধ্যাপক ডঃ দি কে নাথ আৰু ছাত্ৰ একতা সভাৰ বিষয়-ববীয়াসকলে। দিনৰ ১২ বজাৰ পৰা আৰম্ভ হয় বৰ্ষজোৰা সোণালী জয়ন্তীৰ প্ৰথমখন মুকলি সভা সঞ্চালনা কৰে মহাবিদ্যালয়ৰ অধ্যক্ষ ডাঃ ডি চি দাসে।

মুখ্য অতিথি ৰূপে উপস্থিত থাকি প্ৰহ্লাদ মিট্টালে তেখেতৰ ভাষণত কয় য়ে চৰকাৰে হোমিঅ’ চিকিৎসাৰ প্ৰচাৰ আৰু প্ৰসাৰৰ ক্ষেত্ৰত গুৰুত্বপূৰ্ণ ভূমিকা ল’ব লাগে।

উল্লেখযোগ্য যে সোণালী জয়ন্তী বৰ্ষত প্ৰৱেশ কৰা নগাঁৱৰ এইখন মহাবিদ্যালয়ত পাঠ্যক্ৰম আৰু ছাত্ৰ-ছাত্ৰী অনুপাতে নাই পৰ্যাপ্ত শিক্ষক। তাৰোপৰি নাই উপযুক্ত গৱেষণাগাৰ, চেমিনাৰ হল, ছাত্ৰ-ছাত্ৰী সকলৰ বাবে নাই উপযুক্ত ছাত্র বা ছাত্ৰী নিবাস।

তাৰোপৰি শিক্ষাবিদ লক্ষীনাৰায়ণ শৰ্মা, ডাঃ জগমোহন শৰ্মা, ডাঃ চন্দ্ৰকান্ত বৰদলৈ, প্ৰাক্তন ডাঃ অধ্যক্ষ অমৰেন্দ্ৰ কুমাৰ, প্ৰভাকৰ গোস্বামী, সাংবাদিক মুৰুলী বৰুৱাই  মহাবিদ্যালয়খনৰ বিভিন্ন দিশ সামৰি বক্তব্য প্ৰদান কৰে।

আনহাতে বৰ্ষজোৰা সোণালী জয়ন্তীৰ সমূহ কাৰ্যসূচীত সকলো প্ৰাক্তন ছাত্র-ছাত্ৰী, অধ্যাপক-অধ্যাপিকা, কৰ্মচাৰী তথা ৰাইজৰ সহযোগিতা কামনা কৰিছে মহাবিদ্যালয়ৰ অধ্যক্ষ তথা ছাত্র একতা সভাই।

আজিৰ অনুষ্ঠানটিৰ আঁ‌ত ধৰে মহাবিদ্যালয়খনৰ প্ৰাক্তন ছাত্র তথা চিকিৎসা বিষয়া ডাঃ কিনাৰাম বৰাই।