অনিদিৰ্ষ্ট সময়লৈ পিছুৱাই দিয়া হ’ল বোকাখাতত হ’ব লগীয়া আছাম মাষ্টাৰ্চ এথলেটিকচ প্ৰতিযোগিতা

বোকাখাতত ডিচেম্বৰ মাহৰ ২৭ তাৰিখৰ পৰা ৩০ তাৰিখলৈ অনুষ্ঠিত হ’ব লগা অসম মাষ্টাৰ্চ এথলেটিকচ প্ৰতিযোগিতা অনিদিৰ্ষ্ট সময়লৈ পিছুৱাই দিয়া হৈছে। সম্প্ৰতি ৰাজ্যৰ পৰিস্থিতিৰ প্ৰতি লক্ষ্য ৰাখি আচাম মাষ্টাৰ্চ এথলেটিকচ এছ’চিয়েশ্যনে এই সিদ্ধান্ত গ্ৰহণ কৰিছে।

দেওবাৰে গুৱাহাটীত অনুষ্ঠিত হোৱা সন্থাৰ কেন্দ্ৰীয় কাৰ্য নিৰ্বাহকে এই সিদ্ধান্ত গ্ৰহণ কৰা বুলি এক প্ৰেছ বিবৃতিৰ জৰিয়তে জনাইছে সন্থাৰ কেন্দ্ৰীয় সাধাৰণ সম্পাদক ড৹ আৰ পি গোহাঁইয়ে।

উল্লেখযোগ্য যে বোকাখাতত অনুষ্ঠিত হ’ব লগা এই প্ৰতিযোগিতাৰ আয়োজক সমিতিৰ সভাপতি আছিল বোকাখাতৰ বিধায়ক তথা কেবিনেট মন্ত্ৰী অতুল বৰা।

কিন্তু নাগৰিকত্ব (সংশোধন) আইনক লৈ অতুল বৰাই গ্ৰহণ কৰা স্থিতিৰ বাবেই বোকাখাতৰ ছাত্ৰ সংগঠন আৰু স্থানীয় জনসাধাৰণে প্ৰতিযোগিতাখনিত অতুল বৰাৰ উপস্থিতি বিচৰা নাছিল। লগতে অতুল বৰা উপস্থিত হ’লে প্ৰতিবাদী কাৰ্যসূচী গ্ৰহণ কৰিব বুলিও ৰাজহুৱা সভাত কৈছিল।

গতিকে বিষয়টোৰ সম্পৰ্কত অতুল বৰাক অৱগত কৰাৰ বাবে সিদ্ধান্ত লৈ বোকাখাতৰ আয়োজক সমিতিয়ে আছাম মাষ্টাৰ্চ এথলেটিকচ এছ’চিয়েশ্যনৰ কেন্দ্ৰীয় সমিতিক সিদ্ধান্ত গ্ৰহণৰ বাবে অনুৰোধ কৰিছিল।

অৱশেষত ৰাজ্যৰ পৰিস্থিতিৰ প্ৰতি লক্ষ্য ৰাখি বোকাখাতৰ প্ৰতিযোগিতা অনিদিৰ্ষ্ট কালৰ বাবে পিছুৱাৰ সিদ্ধান্ত গ্ৰহণ কৰে আছাম মাষ্টাৰ্চ এথলেটিকচ এছ’চিয়েশ্যনৰ কেন্দ্ৰীয় সমিতিয়ে।